Lao Language | Land Info Working Group
Working towards greater community control over land, forests and natural resources

Archive for the ‘Lao Language / ພາສາລາວ’ Category

ສຳມະນາວຽກງານທີ່ດິນ ແລະ ຊັບພະຍາກອນທຳມະຊາດໃຫ້ແກ່ ສສຊ ແລະ ສສຂ

ຂ່່າວຈາກ: ໜັງສືພິມ ຜູ້ແທນປະຊາຊົນ, ສະບັບວັນທີ 1-4/10/2017

(ສພຊ) ເພື່ອສ້າງຄວາມເຂົ້າໃຈຕໍ່ວຽກງານບໍລິຫານທີ່ດິນ ແລະ ຊັບພະຍາກອນທຳມະຊາດໃຫ້ມີຄວາມເລິກເຊິ່ງ, ສະຖາບັນຄົ້ນຄວ້ານິຕິກຳ ສະພາແຫ່ງຊາດ ໄດ້ຈັດກອງປະຊຸມສຳມະນາ ເພື່ອແລກປ່ຽນຄວາມຮູ້ ແລະ ບົດຮຽນກ່ຽວກັບການບໍລິຫານວຽກງານທີ່ດິນ ແລະ ຊັບພະຍາກອນທຳມະຊາດ ໃຫ້ແກ່ສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນຂັ້ນແຂວງ  (ສສຂ) ທີ່ ສູນ ຮ່ວມມືສາກົນ ແລະ ການຝຶກອົບຮົມ (ICTC) , ນະຄອນຫຼວງວຽງຈັນ ລະຫວ່າງວັນທີ 28-29 ກັນຍາ 2017, ພາຍໃຕ້ການເປັນປະທານຂອງທ່ານ ຄໍາເຜີຍ ປານມາໄລທອງ ຫົວໜ້າ ສະຖາບັນຄົ້ນຄວ້າ ນິຕິກຳແຫ່ງຊາດ; ມີບັນດາທ່ານ ສສຊ ແລະ ສສຂ, ປະທານ-ຮອງປະທານກຳມາທິການ, ຫົວໜ້າ-ຮອງຫົວໜ້າກົມ, ສູນ, ພະນັກງານພາຍໃນ ສພຊ, ຫົວໜ້າກົມນິຕິກຳ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ຕ່າງໜ້າຈາກກະຊວງທີ່ກ່ຽວຂ້ອງ,​ ຫົວໜ້າໂຄງການບ້ານຈຸດສຸມ (VFI), ຕ່າງໜ້າຈາກອົງການອາຫານ (FAO) ແລະ ຕ່າງໜ້າຈາກ (CAMKID)/OXFAM ເຂົ້າຮ່ວມທັງໝົດ 153 ທ່ານ.

ທັ້ງນີ້ ກໍ່ເພື່ອສະໜັບສະໜູນການປະກອບສ່ວນຄວາມຄິດເຫັນຂອງທ່ານ ສສຊ ແລະ ສສຂ ເຂົ້າໃນຮ່າງກົດໝາຍທີ່ດິນ (ສະບັບປັບປຸງ); ການໃຫ້ສຳປະທານ ແລະ ການໃຫ້ເຊົ່າທີ່ດິນ ໂດຍຜ່ານການສົນທະນາແລກປ່ຽນຄວາມຄິດເຫັນກັນ; ພ້ອມນັ້ນ ເພື່ອເຮັດໃຫ້ການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ອົງການຈັດຕັ້ງທາງສັງຄົມ ໃນການຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ບັນດານະໂຍບາຍກ່ຽວກັບທີ່ດິນໃຫ້ມີປະສິດທິພາບທີ່ເພີ່ມຂື້ນ; ເພື່ອຍົກລະດັບຄວາມຮູ້ ແລະ ປະສົບການກ່ຽວກັບວຽກງານການຄຸ້ມຄອງທີ່ດິນ ແລະ ຊັບພະຍາກອນທຳມະຊາດໃຫ້ແກ່ ສສຊ ແລະ ສສຂ ພ້ອມດ້ວຍພະນັກງານທີ່ເປັນເສນາທິການໃຫ້ແກ່ກຳມາທິການຕ່າງໆ.

ລາວຫາລືແຜນແມ່ບົດຈັດສັນທີ່ດິນແຫ່ງຊາດ

ແຫຼ່ງຂ່າວ: ໜັງສືພິມລາວພັດທະນາ

http://www.laophattananews.com/ລາວຫາລືແຜນແມ່ບົດຈັດສັນ/

ກອງປະຊຸມວິທະຍາສາດເພື່ອຄົ້ນຄວ້າ ແລະ ປະກອບຄຳເຫັນໃສ່ຮ່າງແຜນແມ່ບົດຈັດສັນທີ່ດິນແຫ່ງຊາດ ໄດ້ສໍາເລັດລົງເມື່ອບໍ່ດົນມານີ້, ໂດຍການເປັນປະ ທານຂອງທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ໃຫ້ກຽດເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຜູ້ຊີ້ນຳຄະນະສະເພາະກິດ ເພື່ອດຳເນີນການກວດກາ, ສຶກສາຄົ້ນຄວ້າ ແລະ ວິໄຈບັນຫາທີ່ດິນ.

ທ່ານລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໄດ້ ກ່າວວ່າ: ການສ້າງແຜນແມ່ບົດຈັດສັນທີ່ດິນແຫ່ງຊາດ ແມ່ນເພື່ອກຳນົດເຂດທົ່ວປະເທດຢ່າງເປັນລະບົບ ແນໃສ່ການວາງແຜນຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ທີ່ດິນຕາມຫລັກວິຊາການ ແລະ ລະບຽບກົດໝາຍ ເຮັດໃຫ້ທີ່ດິນ ກໍຄືຊັບພະຍາກອນທຳມະຊາດຕ່າງໆມີຄວາມຍືນຍົງ.

ແຂວງວຽງຈັນ ອະນຸຍາດ ໃຫ້ນັກລົງທຶນຈີນ ປູກໄມ້ໃຫ້ໝາກ ຢູ່ເມືອງຫີນເຫີບ 150 ເຮັກຕາ

ແຫຼ່ງທີ່ມາຂອງຂ່າວ: ຂ່າວສານປະເທດລາວ (KPL) 23/06/2017
http://kpl.gov.la/detail.aspx?id=25610
ແຂວງ​ວຽງ​ຈັນ, ​ອະນຸຍາດ​ໃຫ້​ນັກ​ລົງທຶນຈີນ ​​ເຂົ້າປູກ​ໄມ້​ໃຫ້​ໝາກ​ ແບບ​ປະສົມ​ປະສານ ​ຢູ່​ເມືອງ​ຫີນ​ເຫີບ​ ເຊິ່ງຈະ​ປູກ​ໝາກ​ມ່ວງ, ລີ້ນຈີ່​ ແລະ​ ລຳ​ໄຍ, ​ໂດຍ​ຈະ​ບໍ່​ປູກ​ກ້ວຍ ​​ເພື່ອຫວັງ​ຜົນ​ກຳ​ໄລ ​​ໃນ​ໄລຍະ​ສັ້ນ​ເດັດຂາດ, ຊຶ່ງພິທີ​ເຊັນ​ສັນຍາ​ອະນຸຍາດ ​ຢ່າງ​ເປັນ​ທາງ​ການ​ ມີ​ຂຶ້ນ​ໃນ​ວັນ​ທີ 22 ມິຖຸນາ​ ນີ້ ​ລະຫວ່າງ​ທ່ານ ສຸ​ກັນ​ ວິ​ໄລ ຫົວໜ້າ​ພະ​ແນ​ກ ​ແຜນການ-ການລົງທຶນ ​ແຂວງວຽງຈັນ ​ແລະ ​ທ່ານ​ ທາວ ​ຊິນ​ຍີ ປະທານ​ບໍລິສັດ ​ຊິນ​ຮວງ​ຕາວ​ຕີງ​ອີ້​ ການ​ຄ້າ​ຈຳກັດ ໂຄງການ​ດັ່ງກ່າວ, ​ມີ​ມູນ​ຄ່າ​ການ​ລົງທຶນ 1 ລ້ານ​ໂດ​ລາສະຫະລັດ.
ໃນ​ສັນຍາ​ລະ​ບຸ​ວ່າ:​ ໂຄງການ​ປູກ​ໄມ້​ໃຫ້​ໝາກ​ ແບບ​ປະສົມ​ປະສານ ປະກອບ​ມີ ການ​ປູກ​ໝາກມ່ວງ, ໝາກ​ລີ້ນຈີ່ ​ແລະ ​ໝາກ​ລຳ​ໄຍ. ​ຊຶ່ງຈະ​ຈັດ​ຕັ້ງ​ປະ​ຕິບັດ​ ຢູ່​ ບ້ານ​ຄອນ​ແກ້ວ​ ​ເມືອງ​ ຫີນ​ເຫີບ​ ແຂ​ວງ​ວຽງ​ຈັນ ໃນ​ເນື້ອ​ທີ່ 150 ເຮັກຕາ, ​ໂດຍ​ມີ​ໄລ​ຍະ ການ​ສຳປະທານ 30 ປີ​ ນັບ​ແຕ່​ມື້​ເຊັນ​ສັນຍາ ​ເປັນ​ຕົ້ນ​ໄປ ຫລັງ​ຈາກ​ນັ້ນ​ ແມ່ນ​ສົ່ງ​ດິນ​ດັ່ງກ່າວ ​ຄືນ​ໃຫ້​ລັດ.
ທ່ານ​ ທາວ ​ຊິນ​ຍີ ປະທານ​ບໍລິສັດ ​ຊິນ​ຮວງ​ຕາວ​ຕີງ​ອີ້​ ການ​ຄ້າ​ຈຳກັດ ກ່າວວ່າ:​ ໂຄງການ​ນີ້ ​ເປັນ​ໂຄງການ ​ປູກ​ໄມ້​ໃຫ້​ໝາກ​ ແບບ​ປະສົມ​ປະສານ​ ໂດຍ​ຈະ​ນຳ​ໃຊ້​ ເຕັກນິກ​ວິ​ທະ​ນາສາ​ດ ​ເຂົ້າ​ໃນ​ການ​ຜະລິດ, ບໍ່​​ໃຊ້​ເຄມີ​ທີ່​ເປັນ​ອັນຕະລາຍ ​ຜູ້​ທຳ​ການ​ຜະລິດ​, ຕໍ່​ປະຊາຊົນບໍ​ລິ​ເວນ​​ໃກ້​ຄຽງ​ ແລະ ​ໂຄງການ​ ຈະ​ບໍ່​ປູກ​ກ້ວຍ​ ທີ່​ໃຊ້​ສານ​ເຄມີ ​ເພື່ອ​ຫວັງຜົນ​ກຳ​ໄລ​ ໃນ​ໄລຍະ​ສັ້ນ​​ເດັດຂາດ.
ສ່ວນ​ການ​ປູກຕົວ​ຈິງ ແມ່ນ​ຈະ​ເລີ່​ມລົງມື ​ໃນ​ຕົ້ນ​ລະດູຝົນ​ປີໜ້າ, ​ໃນ​ຈຳນວນ 150​ ເຮັກ​ຕາ ​ແມ່ນ​ຈະ​ປູກໝາກມ່ວງ​ 50% ຂອງ​ເນື້ອ​ທີ່​ ຄາດ​ວ່າ 5 ປີ​ຈະ​ໄດ້​​ເກັບ​ຜົນ​ຜະລິດ​ຂາຍ, 70%​ ແມ່ນ​ສົ່ງ​ໄປ​ຈີນ ​ແລະ ​30%​ ແມ່ນ​ຂາຍ​ພາຍ​ໃນ, ສ່ວນດ້ານ​ແຮງ​ງານ ​ແມ່ນ​ຈະ​ນຳ​ໃຊ້​ປະຊາຊົນ ​ຢູ່​ບ້ານ​ຄອນ​ແກ້ວ​ ແລະ ​ບ້ານ​ໄດ້​ຄຽງ​, ຊຶ່ງ​ໂຄງການ​ດັ່ງກ່າວ ມີ​ຄວາມ​ຕ້ອງການ​ແຮງ​ງານ ​ຫລາຍ​ກວ່າ ​50 ຄົນ​, ສ່ວນ​ວິຊາ​ກການ​ແມ່ນ​ນຳ​ໃຊ້​ຄົນ​ຈີນ.

ລາຍຊື່ ປ່າສະຫງວນແຫ່ງຊາດຂອງ ສປປລາວ ພ້ອມທັງເນື້ອທີ່ ແລະ ທີ່ຕັ້ງຂອງປ່າ

ແຫ່ງທີ່ມາຂອງຂ່າວ: ອິດສະຫຼະ, ວັນທີ 11/06/2017
http://www.idsala.com/2017/06/blog-post_11.html
314

ເລັ່ງເຈາະອຸໂມງທາງລົດໄຟ ລາວ-ຈີນ ເພື່ອຕ້ອນຮັບ “ໜຶ່ງແລວທາງ ໜຶ່ງເສັ້ນທາງ”

ແປລາຍງານນີ້ຈາກ: LandLink, 17/5/2017

ເຖິງແມ່ນວ່າຈະມີຝົນຕົກລົງມາຢ່າງໜັກຢູ່ທາງພາກເໜືອຂອງປະເທດ ແຕ່ວ່າການເຈາະອຸໂມງທາງລົດໄຟ ລາວ-ຈີນ ກໍ່ບໍ່ຢຸດຊະງັກ. ກົງກັນຂ້າມ ຍັງມີຄວາມຄືບໜ້າເປັນລຳດັບ. ໃນວັນທີ 17 ພຶດສະພາ ທາງສຳນັກຂ່າວ ວຽງຈັນ ທາມສ໌ ໄດ້ລາຍງານຄວາມຄືບໜ້າ ການກໍ່ສ້າງເສັ້ນທາງລົດໄຟ ລາວ-ຈີນ ເຊິ່ງຖືເປັນຂໍ້ຕໍ່ທີ່ສຳຄັັນຂອງການລິເລີ່ມ “ໜຶ່ງແລວທາງ ໜຶ່ງເສັ້ນທາງ” (One Belt One Road) ຂອງປະທານປະທານາທິບໍດີ ສີ ຈິ້ນຜິງ ຂອງປະເທດຈີນ ເພື່ອປັບສະຖານະ ຂອງ ສປປ ລາວ ຈາກປະເທດ Land Lock ໃຫ້ເປັນ Land Link ໂດຍພົບວ່າ ການຂຸດເຈາະອຸໂມງ 3 ແຫ່ງໃນແຂວງຫຼວງນໍ້າທາຍັງເດີນໜ້າຕໍ່ເນື່ອງທ່າມກາງສາຍຝົນ. ທ່ານ ຈັນທະຈອນ ແກ້ວນະຄອນ ຮອງຫົວໜ້າແຂວງຫຼວງນໍ້າທາ ໃນຖານະຜູ້ປະສານງານການກໍ່ສ້າງທາງລົດໄຟ ລາວ-ຈີນ ບອກກັບ ວຽງຈັນທາມສ໌ ວ່າອຸໂມງບໍ່ເຕັນສາມາດເຈາະໄດ້ເລິກຫຼາຍກວ່າ 50 ແມັດແລ້ວ ສ່ວນອຸໂມງມິດຕະພາບຂ້າມພົມແດນ ລາວ-ຈີນ ມີການເຈາະເລິກໄປໄດ້ 10 ແມັດແລ້ວ. ອຸໂມງມິດຕະພາບມີຄວາມຍາວທັງໝົດ 9.68 ກິໂລແມັດ ເຊິ່ງຢູ່ໃນຝັ່ງຈີນ 7.17 ກິໂລແມັດ ແລະ ຢູ່ຝັ່ງລາວ 2.51 ກິໂລແມັດ ແລະ ຄາດວ່າຈະໃຊ້ເວລາໃນການກໍ່ສ້າງທັງໝົດ 56 ເດືອນ.

ນອກຈາກນີ້ ບໍລິສັດຜູ້ຮັບເໝົາກໍ່ສ້າງຂອງຈີນກຳລັງກຽມວາງເສົາເຂັມຕໍ່ມໍ່ສະພານ ຊຶ່ງເຊື່ອມລະຫວ່າງ ແຂວງອຸດົມໄຊ ໂດຍໃນແຂວງອຸດົມໄຊນັ້ນ ຕ້ອງມີການເຈາະອຸໂມງເຖິງ 30 ດ້ວຍກັນ.

“ ໜຶ່ງແລວທາງ ໜຶ່ງເສັ້ນທາງ ” ກາລະໂອກາດ ແລະ ສິ່ງທ້າທາຍ

ແຫຼ່ງທີ່ມາຂອງຂ່າວ: ສຳນັກຂ່າວສານປະເທດລາວ, KPL, May 12 2017

http://kpl.gov.la/detail.aspx?id=24350

  • ເສັ້ນສີແດງ (ເສັ້ນເທິງ) ແມ່ນແລວທາງ ເສດຖະກິດ ຕາມເສັ້ນທາງ ສາຍໄໝ, ເສັ້ນສີຟ້າ (ເສັ້ນລຸ່ມ) ແມ່ນເສັ້ນທາງ ສາຍໄໝທາງ ທະເລແຫ່ງ ສັດຕະວັດ ທີ 21.
ຄຳວ່າ “ ໜຶ່ງແລວທາງ ໜຶ່ງເສັ້ນທາງ” ຫລື ພາສາອັງກິດເວົ້າວ່າ “ One Belt One Road ” ໄດ້ແປມາຈາກ ພາສາຈີນ “一代一路” ເຊິ່ງອ່ານອອກສຽງ ເປັນພາສາລາວວ່າ  “ອີຕ້າຍ ອີລູ້ ”. “ ໜຶ່ງແລວທາງ ໜຶ່ງເສັ້ນທາງ ” ແມ່ນຫຍໍ້ມາຈາກ ສອງປະໂຫຍກ ແນວຄວາມຄິດ ຍຸດທະສາດ ຂໍ້ລິເລີ່ມອັນສຳຄັນ ໃນການກໍ່ສ້າງ “ ແລວທາງເສດຖະກິດ ເສັ້ນທາງສາຍໄໝ ແລະ ເສັ້ນທາງສາຍໄໝ ທາງທະເລ ແຫ່ງສັດຕະວັດ ທີ 21” ທີ່ ທ່ານ ສີ ຈິນຜິງ ປະທານປະເທດ ແຫ່ງ ສປ ຈີນ ໄດ້ສະເໜີ ໃນໄລຍະການ ເດີນທາງຢ້ຽມຢາມ ບັນດາປະເທດ ຢູ່ອາຊີ ກາງ ແລະ ອາ ຊີຕາເວັນອອກສ່ຽງໃຕ້ ໃນເດືອນກັນຍາ ແລະ ເດືອນຕຸລາ ປີ 2013  ເຊິ່ງໄດ້ເປັນເຂັມທິດ ຕໍ່ການປະຕິຮູບ ຮອບໃໝ່, ມີຄວາມໝາຍ ອັນສຳຄັນຕໍ່ ປະເທດອ້ອມຂ້າງ ກໍຄືຕໍ່ທົ່ວໂລກ ແລະ ກໍ່ໄດ້ຮັບການ ສະໜັບສະໜູນ ຈາກລັດຖະ ບານລາວ ຢ່າງເຕັມທີ່.

ການກໍ່ສ້າງ “ໜຶ່ງແລວທາງ ໜຶ່ງເສັ້ນທາງ” ແມ່ນຢືດໝັ້ນ ຕາມຫລັກການ “ຮ່ວມກັນປຶກສາ, ຮ່ວມກັນສ້າງ, ຮ່ວມກັນຊົມໃຊ້”, ຕັ້ງໜ້າຊຸກຍູ້ ຍຸດທະສາດ ການພັດທະນາ ຂອງບັນດາປະເທດ ທີ່ຢູ່ຕາມແລວທາງ ໃຫ້ເຊື່ອມໂຍງເຂົ້າກັນ. ຈິດໃຈຂໍ້ລິເລີ່ມ “ ໜຶ່ງ ແລວທາງໜຶ່ງ ເສັ້ນທາງ ” ຂອງປະທານ ສີຈິນຜິງ ແມ່ນເພື່ອສືບຕໍ່ ສ້າງກາລະໂອກາດອັນໃໝ່ໃຫ້ແກ່ ການລົງເລິກຮ່ວມມື ກັບຕ່າງປະເທດ ແລະ ຂະຫຍາຍພື້ນທີ່ ອັນໃໝ່ໃນການ ຮ່ວມມືກັບ ພາກພື້ນ, ໂດຍເລັ່ງໃສ່ ເຊື່ອມໂຍງ 5 ຂົງເຂດໃຫຍ່ ຄື: ສົ່ງເສີມການ ເຊື່ອມໂຍງທາງ ດ້ານນະ ໂຍບາຍ, ການເຊື່ອມໂຍງ ທາງດ້ານພື້ນຖານໂຄງລ່າງ, ສ້າງຄວາມສະດວກ ສະບາຍທາງດ້ານການຄ້າ, ​ການເຊື່ອມໂຍງ ທາງດ້ານທຶນຮອນ, ການເຊື່ອມໂຍງ ຄວາມສຳພັນ ລະຫວ່າງປະຊາຊົນ.

ທ່ານນາຍົກເນັ້ນທີ່ດິນເປັນບັນຫາຮີບດ່ວນທີ່ຈະຕ້ອງສືບຕໍ່ແກ້ໄຂ

ແຫຼ່ງທີ່ມາຂອງຂ່າວ: ໜັງສືພິມເສດຖະກິດ-ການຄ້າ,  7/5/2017

https://laoedaily.com.la/2017/05/ລັດຖະບານຍົກທີ່ດິນເປັນບ/

ບັນຫາທີ່ດິນຍັງເປັນບັນຫາເຄັ່ງຮ້ອນມາຢ່າງຕໍ່ເນື່ອງ ເຊິ່ງກອງປະຊຸມສະໄໝສາມັນຂອງສະພາແຫ່ງຊາດໃນຊຸດຜ່ານໆມາ ກໍ່ໄດ້ຍົກບັນຫາດັ່ງກ່າວ ຖາມເຈາະຈີ້ມຂະແຫນງທີ່ກ່ຽວຂ້ອງຢ່າງຕໍ່ເນື່ອງ. ລ້າສຸດໃນກອງປະຊຸມຄັ້ງນີ້ ສະມາຊິກສະພາແຫ່ງຊາດ ກໍ່ໄດ້ຕັ້ງຄໍາຊັກຖາມວ່າ: ບັນຫາການໃຫ້ຊຳປະທານທີ່ດິນ ໃຫ້ກັບບໍລິສັດເອກະຊົນ ທັງພາຍໃນ ແລະ ແຕ່ງປະເທດ ແຕ່ບໍລິສັດບໍ່ປະຕິບັດຕາມສັນຍາ (ຈັດຈອງທີ່ດິນແຕ່ບໍ່ພັດທະນາ?) ບັນຫາບໍລິສັດຂະຫຍາຍເນື້ອທີ່ເກີນກຳນົດທີ່ ພາກລັດອະນຸມັດ ເຮັດໃຫ້ປະຊາຊົນໄດ້ຮັບຜົນກະທົບ ແລະ ບັນຫາທີ່ລັດຖະບານອະນຸມັດທີ່ດິນສພຳປະທານໃຫ້ບໍລິສັດຢູ່ໃນເຂດທ້ອງຖິ່ນ ແຕ່ບໍລິສັດເຮັດຕາມໃຈ ບໍ່ຮັບຟັງອຳນາດ ການປົກຄອງທ້ອງຖິ່ນ ເນື່ອງຈາກເປັນໂຄງການທີ່ໄດ້ຮັບອະນຸມັດຈາກລັດຖະບານ, ທາງລັດຖະບານຈະມີວິທີແກ້ໄຂ ແລະ ມາດຕະການຈັດຕັ້ງປະຕິບັດຄືແນວໃດ?.

ຕໍ່ກັບບັນຫາດັ່ງກ່າວ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຊີ້ແຈງຕໍ່ບັນດາ ສສຊ ວ່າ: ບັນຫານການສຳປະທານທີ່ດິນໃຫ້ແກ່ບໍລິສັດລົງທຶນພາຍໃນ ແລະ ຕ່າງປະເທດທີ່ລັດຖະບານ ຫຼື ແຂວງໄດ້ອະນຸມັດ ປັດຈຸບັນມີຫຼາຍບໍລິສັດໄດ້ຮັບອະນຸຍາດ ສຳປະທານແຕ່ບໍ່ປະຕິບັດຕາມລະບຽບກົດໝາຍ, ລະບຽບການທີ່ກ່ຽວຂ້ອງ, ສັນຍາສຳປະທານ ແລະ ອື່ນໆ; ການບຸກເບີກເນື້ອທີ່ ບໍ່ໄດ້ຮັບອະນຸມັດກໍ່ມີ, ລ່ວງລໍ້າກໍ່ມີ, ກວມເອົາດິນຂອງປະຊາຊົນ, ການພັດທະນາບໍ່ໄປຕາມກຳນົດເວລາ ແລະ ເງືື່ອນໄຂຂອງສັນຍາສຳປະທານ ແລະ ອື່ນໆ.

ທ່ານກ່າວຕື່ມວ່າ: ບັນຫາດັ່ງກ່າວນີ້ແມ່ນມີມາແຕ່ດົນ, ລັດຖະບານຊຸດຜ່ານໆມາກໍ່ໄດ້ພະຍາຍາມແກ້ໄຂ ແຕ່ວ່າຍັງຫຼາຍອັນທີ່ຈະຕ້ອງໄດ້ສືບຕໍ່ແກ້ໄຂ. ລັດຖະບານໄດ້ນຳເອົາບັນຫາທີ່ດິນຂື້ນມາເພື່ອສຶກສາຄົ້ນຄວ້າວ່າ: ການປະຕິບັດກົດໝາຍທີ່ດິນຂອງພວກເຮົາມີ ຈຸດດີ, ຈຸດອ່ອນ ແລະ ຂໍ້ບົກຜ່ອງແນວໃດ? ເຊິ່ງມີຫຼາຍຂໍ້ຈຸດອ່ອນ ແລະ ຂໍ້ບົກຜ່ອງ, ບັນຫາທີ່ຟົດຮ້ອນກໍ່ຄື: ແຂວງມີສິດອະນຸຍາດເທົ່ານັ້ນ ແຕ່ປະຕິບັດຈິງແມ່ນກາຍກັບໂຕທີ່ກຳນົດ, ຕະຫຼອດຮອດເມືອງ ແລະ ບ້ານກໍ່ມີສິດເຊັນໃຫ້ສຳປະທານທີ່ດິນເປັນຕົ້ນ.

ສ່ວນນັດທຸລະກິດສຳປະທານທີ່ດິນ ແຕ່ບໍ່ພັດທະນາຕາມສັນຍາໃຫ້ທ້ອງຖິ່ນລາຍງານຕໍ່ ລັດຖະບານໃຫ້ລົງໄປແກ້ໄຂ ແຕ່ບັນຫາເກີດຂື້ນຜ່ານມານັກລົງທຶນທີ່ໄດ້ສຳປະທານເຂົາເຈົ້າບໍ່ເຄົາລົບການຈັດຕັ້ງທ້ອງຖິ່ນ ເນື່ອງຈາກລັດຖະບານເປັນຜູ້ອະນຸມັດ.

ກອງປະຊຸມສະຫຼຸບຜົນງານຂອງໂຄງການ QDF

ໂດຍ: ແອັດມິນ

ໃນວັນທີ 28 ເດືອນ ເມສາ ປີ 2017 ອົງການ ບ້ານຈຸດສຸມສາກົນ  (VFI) ໄດ້ເປີດກອງປະຊຸມສະຫຼຸບ ການດໍາເນີນງານຂອງ ໂຄງການ QDF. ກອງປະຊຸມຄັ້ງນີ້ແມ່ນໄດ້ຈັດຂື້ນຢູ່ຫ້ອງການຂອງ  VFI ແລະ ໄດ້ມີການນໍາສະເໜີກ່ຽວກັບ ເຄື່ອງມືສື່ສານ ແລະ ປຶກສາຫາລືຊຸມຊົນໃນຂະບວນການຈັດຫາທີ່ດິນ ທີ່ສອດຄ້ອງກັບມາດຖານຂອງ FPIC. ບັນດາກິດຈະກຳ ແລະ ເຄື່ອງມື່ແມ່ນເກີດມາຈາກການຮ່ວມມືກັນ ກັບອົງການຈັດຕັ້ງທາງສັງຄົມ ແລະ  ບັນດາ ບໍລິສັດຕ່າງໆ (ພາກສວ່ນເອກກະຊົນ) ເຊິ່ງນຳພາໂດຍ ບ້ານຈຸດສຸມສາກົນ  (VFI), ບໍລິສັດ ສະຕໍຣາ ເອັນໂຊ ລາວ, ຫ້ອງການ RECOFTC ປະຈຳລາວ, ໂຄງການ LIFE ທີ່ໄດ້ຮັບການສະໜັບສະໜູນ ໂດຍ ອົງການ MRLG. ໃນກອງປະຊຸມນີ້ ຍັງໄດ້ເປີດໂອກາດໃຫ້ຜູ້ເຂົ້າຮ່ວມໃນການຖາມ ຄຳຖາມ ແລະ ໂອ້ລົມແລກປ່ຽນນຳກັນກ່ຽວກັບວຽກງານດັ່ງກ່າວ.

ທີມງານຈາກຫ້ອງການ VFI and RECOFTC ປະຈຳລາວ ກຳລັງສະຫຼຸບຜົນງານຂອງການປະຕິບັດໂຄງການ QDF, ວັນທີ 28 ເດືອນ ເມສາ ປີ 2017

ທີມງານຈາກຫ້ອງການ VFI and RECOFTC ປະຈຳລາວ ກຳລັງສະຫຼຸບຜົນງານຂອງການປະຕິບັດໂຄງການ QDF, ວັນທີ 28 ເດືອນ ເມສາ ປີ 2017

ປະເດັນຫຼັກໆໃນການນຳສະເໜີໃນກອປະຊຸມນີ້ກໍ່ຄື ການນຳໃຊ້ບັນດາເຄື່ອງມືການສື່ສານໃນການໃຫ້ຄຳປຶກສາຫາລື ທີ່ທາງທີມງານໄດ້ຜະລິດຂື້ນມາເພື່ອ ນຳໃຊ້ເຂົ້າໃນການອະທີບາຍຂະບວນການກ່ຽວກັບການຈັດຫາທີ່ດິນໃຫ້ແກ່ຊາວບ້ານໃຫ້ມີຄວາມເຂົ້າໃຈກ່ຽວກັບຂະບວນການຫຼາຍຂື້ນ ໂດຍສະເພາະແມ່ນ ການນຳໃຊ້ ໂປສເຕີ ແລະ ວິດີໂອ ທີ່ໄດ້ນຳໃຊ້ເຂົ້າໃນການຝຶກອົບຮົມ ຂອງທີມງານ ກັບ ຊາວບ້ານ.

ໂດຍລວມແລ້ວກິດຈະກຳທີ່ໄດ້ຈັດຂື້ນແມ່ນ ເປັນກໍລະນີສຶກສາ ເຖິງການເອົາໃຈໃສ່ ແລະ ຄວາມຈິງໃຈຂອງການເຮັດວຽກຮ່ວມກັນລະຫວ່າງ ບໍລິສັດ ແລະ ບັນດາບ້ານ.

ນາຍົກລາຍງານການປະຕິບັດວຽກງານຂອງລັດຖະບານ 13 ຢ່າງທີ່ພົ້ນເດັ່ນ

Source: Target Magazine,25/04/2017
https://targetlaos.com/article/15193
“ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ VIII, ລັດຖະບານຊຸດນີ້ໄດ້ສັງລວມສິ່ງທີ່ພົ້ນເດັ່ນ 13 ບັນຫາ ເຊິ່ງໜຶ່ງໃນນັ້ນ ແມ່ນວຽກງານການຄຸ້ມຄອງນຳໃຊ້ທີ່ດິນ ເຊິ່ງເກີດມີບັນຫາຕາມມາຢ່າງຫຼວງຫຼາຍ ແລະ ລັດຖະບານໄດ້ຕັ້ງບັນຫາຂຶ້ນເພື່ອຄົ້ນຄວ້າ ແນ່ໃສ່ການປັບປຸງນະໂຍບາຍທີ່ດິນແຫ່ງຊາດ ໂດຍໄດ້ນຳເຂົ້າເປັນວາລະໜຶ່ງຂອງກອງປະຊຸມຄົບຄະນະຂອງຄະນະບໍລິຫານສູນກາງພັກຄັ້ງທີ IV ສະໄໜທີ V ເຊິ່ງປັດຈຸບັນ ກຳລັງປັບປຸງໃຫ້ເປັນມະຕິຂອງພັກ ແລະ ຈະສະເໜີໃຫ້ສະພາແຫ່ງຊາດເພື່ອພິຈາລະນາໃນຂັ້ນຕໍ່ໄປ.”

ທ່ານນາຍົກປະຕິຍານຈະແກ້ໄຂບັນຫາທີ່ດິນຄຸມເຄືອ

ຂ່າວແປຈາກ ໜັງສືພີມ ວຽງຈັນທາມ ວັນທີ 6 ກຸມພາ 2017

ທ່ານນາຍົກລັດຖະມົນຕີທອງລຸນ ສີສຸລິດ ໄດ້ໃຫ້ຄໍາໝັ້ນສັນຍາວ່າຈະຫາວິທີແກ້ໄຂບັນຫາທີ່ດິນທີ່ພົ້ນເດັ່ນ ແລະ ລັດຖະບານ ໄດ້ແຕ່ງຕັ້ງຄະນະກຳມະການສະເພາະກິດເພື່ອກວດກາຄືນບັນຫາດັ່ງກ່າວເພື່ອແກ້ໄຂ.

ຄະນະກຳມະການດັ່ງກ່າວຈະກວດກາບັນຫາການສຳປະທານທີ່ດິນ, ການໂອນກຳມະສິດທີ່ດິນໃນກໍລະນີ ຕ່າງໆ, ການ ປະຕິບັດນະໂຍບາຍຫັນຊັບສິນເປັນທຶນ, ບັນຫາທີ່ປະຊາຊົນຈັບຈອງທີ່ດິນ ແລະ ບັນຫາອຶ່ນໆ ພາຍຫລັງ ທີ່ພົບວ່າບັນຫາເລົ່ານີ້ໄດ້ກໍ່ໃຫ້ເກີດຂໍ້ຂັດແຍ່ງທີ່ດິນ.

ທ່ານນາຍົກໄດ້ກ່າວຕໍ່ກອງປະຊຸມປະຈຳປີ 2016 ຂອງຂະແໜງປ້ອງກັນຄວາມສະຫງົບ ເຊິ່ງໄດ້ຈັດຂຶ້ນທີ່ ນະ ຄອນຫລວງວຽງຈັນເມື່ອໝໍ່ໆມານີ້ວ່າ: ຜ່ານມາໄດ້ມີການປອມເອກະສານເພື່ອຄອບຄອງສິດນຳໃຊ້ທີ່ດິນ, ສິດນຳ ໃຊ້ທີ່ດິນກາຍເປັນຂອງຜູ້ນັ້ນຜູ້ນີ້.

ທ່ານນາຍົກໄດ້ກ່າວວ່າບັນຫາເລົ່ານີ້ໄດ້ເຮັດໃຫ້ທີ່ດິນລັດຫລຸດລົງ. ຄະນະກຳມະການດັ່ງກ່າວຈະດຳເນີນ ການກວດກາເບິ່ງວ່າການສຳປະທານທີ່ດິນແມ່ນຖືກຕ້ອງແລ້ວບໍ່, ການໂອນກຳມະສິດທີ່ດິນໃນກໍລະນີຕ່າງໆ ແມ່ນຖືກຕ້ອງແລ້ວຫລືບໍ່, ການຫັນຊັບສິນເປັນທຶນເຮັດເໝາະສົມແລ້ວຫລືບໍ່ແລ້ວມີການສວຍໃຊ້ອຳນາດເພື່ອຜົນ ປະໂຫຍດສ່ວນຕົວ. ການກວດກາຍັງຈະເບິ່ງວ່າມີການຍຶດຈອງທີ່ດິນຂອງປະຊາຊົນທີ່ຜິດກົດໝາຍຫລືບໍ່ ລວມທັງ ບັນຫາທີ່ປະຊາຊົນຍຶດຈອງທີ່ດິນລັດທີ່ບໍ່ເໝາະສົມ.

ລັດຖະບານໄດ້ມອບໃຫ້ຄະນະກຳມະການດັ່ງກ່າວ, ເຊິ່ງຊີ້ນຳໂດຍຜ່ານ ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ແລະ ຫົວໜ້າອົງການກວດກາແຫ່ງລັດ, ກວດກາ ແລະ ວິໃຈບັນຫາທີ່ດິນທີ່ພົ້ນເດັ່ນ ເລົ່ານັ້ນມາລາຍງານໃຫ້ລັດຖະບານພາຍໃນເດືອນຕຸລາ. ຜົນຂອງການກວດກາດັ່ງກ່າວຈະໄດ້ລາຍງານໃຫ້ກົມການເມືອງ, ສູນກາງພັກ ແລະ ສະພາແຫ່ງຊາດ ເພື່ອຂໍທິດຊີ້ນຳ ແລະ ວິທີແກ້ໄຂ. ພະນັກງານທ່ານໜຶ່ງຂອງອົງການກວດ ສອບແຫ່ງລັດໄດ້ກ່າວວ່າການຈັດຕັ້ງປະຕິບັດນະໂຍບາຍຫັນຊັບສິນເປັນທຶນແມ່ນໜຶ່ງໃນບັນຫາທີ່ທາງອົງການກວດສອບແຫ່ງລັດ ກຳລັງດຳເນີນການກວດສອບຢູ່ເພື່ອເບິ່ງວ່ານະໂຍບາຍດັ່ງກ່າວຖືກຈັດຕັ້ງປະຕິບັດຢ່າງຖືກຕ້ອງຫລືບໍ່.

ລັດຖະບານໄດ້ອອກນະໂຍບາຍດັ່ງກ່າວເມື່ອຫລາຍປີຜ່ານມາ. ເຊິ່ງຜົນຂອງການຈັດຕັ້ງປະຕິບັດເຫັນວ່າຫລາຍ ອົງການລັດກໍ່ໄດ້ໃຫ້ນັກລົງທຶນມາສ້າງສຳນັກງານໃຫ້ໃຫມ່ໃນເຂດນອກຕົວເມືອງເພື່ອແລກປ່ຽນກັບດິນລັດໃນຕົວເມືອງທີ່ ສຳນັກງານເກົ່າຕັ້ງຢູ່. ນີ້ກໍ່ໝາຍຄວາມວ່າອົງການລັດສາມາດມີຫ້ອງການໃຫມ່ໂດຍທີ່ລັດຖະບານບໍ່ຕ້ອງໄດ້ຈັດສັນ ງົບປະມານມາສ້າງຫ້ອງການໃຫມ່ດັ່ງກ່າວ. ນະໂຍບາຍນີ້ຍັງສົ່ງເສີມຄວາມພະຍາຍາມຂອງລັດຖະບານເພື່ອຍ້າຍ ບັນດາຫ້ອງການລັດຢູ່ໃນຕົວເມືອງອອກໄປຢູ່ເຂດນອກທີ່ບໍ່ແອອັດເພື່ອຫລຸດຜ່ອນບັນຫາຈາລະຈອນຕິດຂັດ ແຕ່ວ່າມີ ຫລາຍບັນຫາເກີດຂຶ້ນເມື່ອຫລາຍອົງການລັດບໍ່ໄດ້ລາຍງານໂຄງການທີ່ປະຕິບັດພາຍໃຕ້ນະໂຍບາຍຫັນຊັບສິນເປັນທຶນ ໃຫ້ກະຊວງແຜນການ ແລະ ການລົງທຶນຮັບຊາບ, ດັ່ງນັ້ນໂຄງການເລົ່ານີ້ບໍ່ໄດ້ລວມເຂົ້າໃນແຜນ ພັດທະນາເສດຖະກິດ-ສັງຄົມນັ້ນໝາຍຄວາມວ່າໂຄງການເລົ່ານີ້ບໍ່ໄດ້ຖືກຮັບຮອງໂດຍສະພາແຫ່ງຊາດ.   ຍິ່ງໄປກວ່ານັ້ນໂຄງການເລົ່ານີ້ບໍ່ໄດ້ຜ່ານ ຂັ້ນຕອນການປະມູນເຊິ່ງສ້າງຄວາມເປັນຫ່ວງວ່າມັນອາດຈະເປັນຊອງວ່າງໃຫ້ເຈົ້າໜ້າທີ່ຮັບຜິດຊອບທີ່ຂາດວິໃນຫາຜົນປະ ໂຫຍດສ່ວນຕົວ. ດ້ວຍເຫດນັ້ນ, ລັດຖະບານຈຶ່ງໄດ້ສັ່ງໂຈະການປະຕິບັດນະໂຍບາຍດັ່ງກ່າວຕາມການ ຮ້ອງຂໍຂອງສະພາເພື່ອທົບທວນຄືນນະໂຍບາຍ ແລະ ວາງມາດຕະການເພີ້ມເຕີ້ມເພື່ອປິດຊອງວ່າງ.

Powered by WordPress | Download Free WordPress Themes | Thanks to Themes Gallery, Premium Free WordPress Themes and Free Premium WordPress Themes