Working towards greater community control over land, forests and natural resources

Archive for the ‘Lao Language / ພາສາລາວ’ Category

ກອງປະຊຸມແລກປ່ຽນ ວຽກງານບໍລິຫານທີ່ດິນຂົງເຂດແມ່ນໍ້າຂອງ

ຂ່າວໂດຍ: ໜັງສືພິມ ເສດຖະກິດ – ສັງຄົມ

ວັນທີ 16 ພຶດສະພາ 2018

ກອງປະຊຸມແລກປ່ຽນບົດຮຽນຂອງອົງການຈັດຕັ້ງທາງສັງຄົມ ກ່ຽວກັບວຽກງານບໍລິຫານທີ່ດິນໃນຂົງເຂດແມ່ນໍ້າຂອງໄດ້ຈັດຂື້ນໃນວັນທີ 14 ພຶດສະພາ ຜ່ານມາທີ່ນະຄອນຫຼວງວຽງຈັນ ໂດຍໄດ້ຮັບການສະໜັບສະໜູນຈາກ ໂຄງການຄຸ້ມຄອງທີ່ດິນໃນພາກພື້ນແມ່ນໍ້າຂອງ (MRLG) ຊຶ່ງລວມມີ ສປປລາວ, ຫວຽດນາມ, ກໍາປູເຈຍ ແລະ ມຽນມາເຂົ້າຮ່ວມ.

ບັນດາຜູ້ເຂົ້າຮ່ວມກອງປະຊຸມ ພາບໂດຍ: LIWG

ບັນດາຜູ້ເຂົ້າຮ່ວມກອງປະຊຸມ
ພາບໂດຍ: LIWG

ຈຸດປະສົງ ຂອງກອງປະຊຸມຄັ້ງນີ້ ກໍ່ເພື່ອເປັນການແລກປ່ຽນບົດຮຽນຮ່ວມກັນກ່ຽວກັບການບໍລິຫານທີ່ດິນຂອງແຕ່ລະອົງການ ແລະ ປະເທດຂອງຕົນ, ການສະໜັບສະໜູນເຊິ່ງກັນ ແລະ ກັນ ໃນການສົ່ງເສີມໃຫ້ເກີດມີສ່ວນຮ່ວມຂອງພາກລັດ, ພາກເອກະຊົນ, ຄູ່ຮ່ວມພັດທະນາ ແລະ ຊຸມຊົນມີການເຮັດວຽກຮ່ວມກັນກນໃນການຄຸ້ມຄອງທີ່ດິນ, ການປ້ອງກັນຄວາມຂັດແຍ້ງ ແລະ ແກ້ໄຂບັນຫາກ່ຽວກັບປະເດັນດັ່ງກ່າວຢູ່ພາຍໃນກຸ່ມແມ່ນມຸ້ງເນັ້ນກ່ຽວກັບການແລກປ່ຽນດ້ານຍຸດທະສາດໃນການກໍານົດເປົ້າໝາຍກ່ຽວກັບການສະໜັບສະໜູນ ແລະ ການຮ່ວມມືຂອງອົງການຈັດຕັ້ງທາງສັງຄົມໃນແຕ່ລະປະເທດ.

ນອກຈາກນີ້ ຍັງເປັນການຮຽນຮູ້ ແລະ ແລກປ່ຽນກັນ ກ່ຽວກັບກໍລະນີສຶກສາແຜນການຄຸ້ມຄອງຮ່ວມປ່າສະຫງວນຫີນໜາມໜໍ່ຂອງອົງການຈັດຕັ້ງທີ່ບໍ່ຫວັງຜົນກໍາໄລ, ໂດຍກອງປະຊຸມໄດ້ນໍາສະເໜີລະບົບການບໍລິຫານຮ່ວມຂອງການຄຸ້ມຄອງປ່າສະຫງວນຫີນໜາມໜໍ່ທີ່ຕັ້ງຢູ່ເມືອງບົວລະພາ ແຂວງຄໍາມ່ວນ ເຊິ່ງມີເນື້ອທີ່ທັງໝົດ 82,000 ເຮັກຕາ, ເປັນເຂດຜາຫີນປູນທີ່ຕັ້ງຢູ່ຕາມເຂດຊາຍແດນ ລາວ, ຫວຽດນາມ. ນອກນັ້ນຍັງມີການນໍາສະເໜີກ່ຽວກັບແຜນຍຸດທະສາດການຄຸ້ມຄອງຮ່ວມປ່າສະຫງວນຫີນໜາມໜໍ່ ແລະ ການທ່ອງທ່ຽວແບບຢືນຍົງ ແລະ ແຜນການປ້ອງກັນປົກປັກຮັກສາປ່າສະຫງວນຖໍ້າ.

ເຊິ່ງໃນລະຫວ່າງວັນທີ 15 – 18 ພຶດສະພາ 2018 ຜູ້ເຂົ້າຮ່ວມກອງປະຊຸມຈະໄດ້ລົງໄປພື້ນທີ່ເຂດປ່າສະຫງວນດັ່ງກ່າວ ເພື່ອຮຽນຮູ້ກ່ຽວກັບວຽກງານການຄຸ້ມຄອງ ຮ່ວມປ່າສະຫງວນແຫ່ງຊາດພີນໜາມໜໍ່ ແລະ ພົບປະປະຊາຊົນ ເພື່ອຮຽນຮູ້ກ່ຽວກັບການຄຸ້ມຄອງຊັບພະຍາກອນທໍາມະຊາດໃນພື້ນທີ່ດັ່ງກ່າວ.

ປະກາດຮັບນັກແຕ້ມອອກແບບປະຕິທິິນກົດໝາຍປີ 2019

ໂດຍ ກຸ່ມແລກປ່ຽນຂໍ້ມູນເລື່ອງທີ່ດິນ, ວັນທີ 7 ພຶດສະພາ 2018 

ກຸ່ມແລກປ່ຽນຂໍ້ມູນເລື່ອງທີ່ດິນ ຕ້ອງການນັກແຕ້ມ ຮູບປະຕິທິນສຳລັບປີ 2019 (Graphic designer),

ດັ່ງນັ້ນຈິ່ງຂໍເຊີນນັກແຕ້ມຮູບທີ່ມີຄວາມສາມາດ ມີປະສົບການແລະສົນໃຈທີ່ຈະປະມູນແຕ້ມຮູບໃຫ້ແກ່ປະຕິທິນຂອງພວກເຮົາ ກະລຸນາສົ່ງໃບຊີວະປະຫວັດ ແລະ ແຈ້ງເຈດຈຳນົງມາຫາ ພວກເຮົາ ຜ່ານ ອີແມວ asc@laolandinfo.org, ໂທ 030 9815657 ໃນໂມງລັດຖະການ. ກະລຸນາຊ່ວຍບອກຕໍ່ກັນດ້ວຍ ຂໍຂອບໃຈ
ດ້ວຍຄວາມຮັກແພງ
ກອງເລຂາ LIWG.

……………………………………………………………………………..

ຂໍ້ມູນເພີ່ມເຕີມ: ເບິ່ງປະຕິທິນສະບັບກ່ອນໜ້ານີ້ຂອງພວກເຮົາໄດ້ທີ່: http://www.laolandinfo.org/links/legal-calendar/

LIWG

ວິທີການດຳເນີນການມີສ່ວນຮ່ວມໃນການປົກປັກຮັກສາສິ່ງແວດລ້ອມ

ໂດຍ ກຸ່ມແລກປ່ຽນຂໍ້ມູນເລື່ອງທີ່ດິນ (LIWG), ວັນທີ 7 ພຶດສະພາ 2018

ປະຕິທິນກົດໝາຍ ທີ່ພັດທະນາຂື້ນມາໂດຍ ບັນດາສະມາຊິກຂອງ LIWG ໂດຍການປະສານງານ ແລະ ການດຳເນີນງານໂດຍ ກອງເລຂາ LIWG.  ປະຕິທິນສະບັບນີ້ ແມ່ນເຄື່ອງມືສື່ສານໜຶ່ງທີ່ພັດທະນາມາຈາກ ເນື້ອໃນທາງດ້ານນິຕິກຳ ແລະ ນະໂຍບາຍຕ່າງໆທີ່ມີລັກສະນະເຂົ້າໃຈງ່າຍ ຊຶ່ງສາມາດເປັນເຄື່ອງມືສຳລັບການເຜີຍແຜ່ຂໍ້ມູນຫາ ປະຊາຊົນໃນທ້ອງຖິ່ນ, ພ້ອມທັງເປັນບ່ອນອີງທາງດ້ານຂໍ້ແນະນຳທາງດ້ານກົດໝາຍເພື່ອຊ່ວຍໃຫ້ຂໍ້ມູນທີ່ຈຳເປັນ ແລະ ສຳຄັນສຳລັບການຈັດຕັ້ງປະຕິບັດວຽກງານໃຫ້ສອດຄ່ອງກັບລະບຽບກົດໝາຍ.

LIWG 2018_P03_11Dec2017

ເຊິ່ງໃນປະຕິທິນ ປະຈຳເດືອນ ພຶດສະພາ – ມິຖຸນາ 2018 ມີຫົວຂໍ້ວ່າ “ວິທິການດໍາເນີນການມີສ່ວນຮ່ວມໃນການປົກປັກຮັກສາສິ່ງແວດລ້ອມ” ເຊິ່ງແມ່ນນໍາສະເໜີ ເອກະສານ ທາງກົດໝາຍ 2 ສະບັບ ທີ່ກ່ຽວຂ້ອງກັບຫົວຂໍ້ດັ່ງກ່າວຄື:

ເອກະສານອ້າງອີງ: ກົດໝາຍ ວ່າດ້ວຍ ການປົກປັກຮັກສາສິ່ງແວດລ້ອມ (ສະບັບປັບປຸງ) ເລກທີ 29 /ສພຊ, ລົງວັນທີ 18 ທັນວາ 2012, ໄດ້ນໍາສະເໜີ ມາດຕາ 6 (ປັບປຸງ) ກ່ຽວກັບຫຼັກການ ກ່ຽວກັບການປົກປັກຮັກສາສິ່ງແວດລ້ອມ ເຊິ່ງໄດ້ລະບຸວ່າ:

ການປົກປັກຮັກສາສິ່ງແວດລ້ອມ ໃຫ້ປະຕິບັດຕາມຫຼັກການຕົ້ນຕໍ ດັ່ງນີ້:

  1. ພັດທະນາເສດຖະກິດ-ສັງຄົມ ຕິດພັນກັບການປົກປັກຮັກສາສິ່ງແວດລ້ອມ ສັງຄົມ ແລະ ທຳມະຊາດ ແບບຍືນຍົງ;
  2. ເອົາການປ້ອງກັນສິ່ງແວດລ້ອມສັງຄົມ ແລະ ທຳມະຊາດ ເປັນວຽກງານຕົ້ນຕໍ ແລະ ເອົາ ການບູລະນະ ຟື້ນຟູສິ່ງແວດລ້ອມສັງຄົມ ແລະ ທຳມະຊາດ ເປັນວຽກສຳຄັນ;

ຮ່າງກົດໝາຍວ່າດ້ວຍທີ່ດິນສະບັບປັບປຸງໄດ້ເພີ່ມເນື້ອໃນເຂົ້າເກືອບຮ້ອຍມາດຕາ

ຂ່າວໂດຍ ໜັງສືພິມລາວພັດທະນາ, ວັນທີ 11 ມີນາ 2018

www.laophattananews.com/archives/29022

ຮ່າງກົດໝາຍວ່າດ້ວຍທີ່ດິນສະບັບປັບປຸງໃໝ່ໄດ້ເພີ່ມເນື້ອໃນເຂົ້າຕື່ມເກືອບຮ້ອຍມາດຕາຄື ຈາກເດີມມີພຽງ 6 ພາກ, 14 ໝວດ ແລະ 87 ມາດຕາ ມາເປັນ 14 ພາກ, 32 ໝວດ ແລະ 183 ມາດຕາ ແລະ ເມື່ອທ້າຍອາທິດທີ່ຜ່ານມາ ກໍ່ໄດ້ມີກອງປະຊຸມເປີດກວ້າງທາບທາມຜ່ານຮ່າງກົດໝາຍດັ່ງກ່າວ, ໂດຍການເປັນປະທາານຂອງທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ເພື່ອທົບທວນການຜັນຂະຫຍາຍມະຕິຂອງຄະນະບໍລິຫານງານສູນກາງພັກວ່າດ້ວຍ ການເພີ່ມທະວີວຽກງານຄຸ້ມຄອງ ແລະພັດທະນາທີ່ດິນໄລຍະໃໝ່ ແລະ ປຶກສາຫາລື, ຄົ້ນຄວ້າປະກອບຄຳຄິດເຫັນໃສ່ເນື້ອໃນຂອງຮ່າງກົດໝາຍວ່າດ້ວຍທີ່ດິນສະບັບປັບປຸງ ເພື່ອໃຫ້ມີເນື້ອໃນຄົບຖ້ວນ, ສົມບູນ ແລະະ ເປັນເອກະພາບກັນໃນດ້ານຫຼັກການ, ກ່ອນຈະສະເໜີໃຫ້ກະຊວງຍຸຕິທຳກວດກາຄວາມສອດຄ່ອງທາງດ້ານກົດໝາຍ ແລະ ສະເໜີລັດຖະບານຮັບຮອງເອົາໃນກອງປະຊຸມລັດຖະບານປະຈຳເດືອນພຶດສະພາ ແລະ ນຳສະເໜີຕໍ່ກອງປະຊຸມສະໄໝສາມັນຄັ້ງທີ 6 ຂອງສະພາແຫ່ງຊາດຊຸດທີ VIII ພິຈາລະນາຮັບຮອງເອົາ.

ທ່ານລັດຖະມົນຕີກະຊວວງຊັບພະຍາກອນທຳມະຊາດ ແລະ ສິ່ງແວດລ້ອມ ກ່າວວ່າ: ໃນໄລຍະຜ່ານມາ, ພັກ ແລະ ລັດຖະບານໄດ້ມີນະໂຍບາຍ, ກົດໝາຍ ແລະ ລະບຽບການຕ່າງໆເພື່ອຄຸ້ມຄອງກ່ຽວກັບທີ່ດິນ, ເພື່ອຮັບປະກັນໃຫ້ປະຊາຊົນບັນດາເຜົ່າມີຄວາມຕື່ນຕົວເປັນເຈົ້າຂອງທີ່ດິນ, ປົກປັກຮັກສາ, ນໍາໃຊ້ ແລະ ມີການພັດທະນາທີ່ດິນຫຼາຍຂື້ນ, ໂດຍສະເພາະນຳໃຊ້ການຜະລິດກະສິກຳ, ປ່າໄມ້, ອຸດສາຫະກຳ, ປຸກສ້າງ ແລະ ອື່ນໆ ເພື່ອນໍາຜົນປະໂຫຍດມາສູ່ໃຫ້ຕົນເອງ ແລະ ປະເທດຊາດ.

100 ກວ່າຄອບຄົວຖືກໂຄງການ ເຂດເສດຖະກິດພິເສດມະຫານະທີສີພັນດອນ

ຂ່າວໂດຍ: Lao post, ວັນທີ 3 ມັງກອນ 2018

ປະຈຸບັນໂຄງການພັດທະນາເຂດ ເສດຖະກິດພິເສດມະຫານະທີສີພັນດອນ ແມ່ນໄດ້ສຳເລັດການສຳຫຼວດ ແລະຈະລົງມືກໍ່ສ້າງໃນປີນີ້ ໂດຍມີເນື້ອທີ່ທັງໝົດ 9,8 ພັນເຮັກຕາ ມີມູນຄ່າການລົງທຶນຫຼາຍກວ່າ 9 ຕື້ໂດລາ ຊຶ່ງຈະສ້າງໃຫ້ສຳເລັດທຸກຮູບແບບໃນປີ 2050 ຂະນະທີ່ມີຜູ້ໄດ້ຮັບຜົນກະທົບຈາກໂຄງການທັງໝົດ 100 ກວ່າຄອບຄົວ.

SEZ 4000 islands

ອີງຕາມແຫຼ່ງຂໍ້ມູນຈາກໜັງສືພິມຈຳປາໃໝ່ລະບຸວ່າ: ໃນວັນທີ 29 ທັນວາຜ່ານມາທີ່ພະແນກແຜນການ ແລະການ ລົງທຶນແຂວງຈຳປາສັກ ໄດ້ມີກອງປະຊຸມ ຜ່ານຮ່າງບົດວິພາກປະເມີນຄວາມເປັນ ໄປໄດ້ທາງດ້ານເສດຖະກິດເຕັກເຕັກ, ແຜນແມ່ບົດປະເມີນຜົນກະທົບຕໍ່ສິ່ງແວດລ້ອມ ແລະສັງຄົມຂອງໂຄງການດັ່ງກ່າວ ຊຶ່ງໃນກອງປະຊຸມທ່ານ ສິດທິໄຊ ໄຊຍະວົງ ປະທານທີ່ປືກສາໂຄງການໄດ້ກ່າວ ວ່າ: ໂຄງການພັດທະນາເຂດເສດຖະກິດ ພິເສດມະຫານະທີສີພັນດອນ ມີເນື້ອທີ່ທັງໝົດ 9.800 ເຮັກຕາ ມີມູນຄ່າການລົງທຶນ ຫຼາຍກວ່າ 9 ຕື້ໂດລາ ໄລຍະເວລາຄືນທຶນ 33 ປີ ໂດຍສາມາດດຶງດູດນັກທ່ອງທ່ຽວ ໄດ້ຫຼາຍກວ່າ 15 ລ້ານຄົນ ຈະມີລາຍຮັບຈາກການທ່ອງທ່ຽວ 1,8 ຕື້ໂດລາຕໍ່ປີ, ສ້າງວຽກເຮັດງານທຳ ໄດ້ 1 ແສນຄົນ ໃນນັ້ນ ແມ່ນຈະໄດ້ສ້າງໂຮງແຮມ 5 ດາວ ແລະກາຊິໂນຫຼາຍກວ່າ 35 ແຫ່ງ, ສ້າງລາຍຮັບຈາກການປັນຜົນ ແລະພາສີອາກອນໃຫ້ລັດຖະບານ 200 ລ້ານໂດລາຕໍ່ປີ.

ປະຕິທິນຂໍ້ມູນດ້ານກົດໝາຍເປັນສື່ຄວາມຮູ້ດ້ານນິຕິກຳ

ຂ່າວໂດຍ: ໜັງສືພຶມວຽງຈັນໃໝ່, ວັນທີ 22 ທັນວາ 2017

ທ່ານ ນາງເຊແລດຕິນ ໂກຣແຊວ, ຜູ້ອຳ ນວຍການ ອົງການເຮວວີຕັດ ປະຈຳລາວ ແລະ ເປັນປະທານ LIWG ຂື້ນກ່າວເປີດງານ ພາບໂດຍ: LIWG

ທ່ານ ນາງເຊແລດຕິນ ໂກຣແຊວ, ຜູ້ອຳ ນວຍການ ອົງການເຮວວີຕັດ ປະຈຳລາວ ແລະ ເປັນປະທານ LIWG ຂື້ນກ່າວເປີດງານ
ພາບໂດຍ: LIWG

ປະຕິທິນເຜີຍແຜ່ຂໍ້ມູນທາງດ້ານກົດໝາຍປະຈຳປີ 2018 ໄດ້ຄົ້ນຄວ້າ ແລະ ຈັດພິມໂດຍການຮ່ວມມື່ ລະ ຫວ່າງອົງການຈັດຕັ້ງທາງສັງຄົມລາວ ແລະ ສາກົນ ເຊິ່ງເປັນສ່ວນໜຶ່ງໃນການສື່ສານຄວາມຮູ້ທາງດ້ານນິຕິກຳເຊັ່ນ: ລັດຖະທຳມະນູນ, ກົດໝາຍ, ດຳລັດ, ບົດແນະນຳໃນຂົງເຂດທີ່ດິນ ຊັບພະຍາກອນທຳມະຊາດ ແລະ ສິ່ງແວດລ້ອມ, ບົດບາດຍິງ-ຊາຍ ແລະ ສົນທີສັນຍາ. ສຳລັບປະຕິທິນສະບັບນີ້ໄດ້ປະກອບດ້ວຍຮູບພາບ ແລະ ໜ້າຫຼັກແຕ່ລະໜ້າມີເນື້ອໃນທີ່ສາມາດນຳໃຊ້ໄດ້ໃນທາງກົດໝາຍ ແລະ ນະໂຍບາຍຕ່າງໆທີ່ເຂົ້າໃຈງ່າຍ ແລະ ສາມາດເປັນເຄື່ອງມືເຜີຍແຜ່ຂໍ້ມູນຫາປະຊາຊົນໃນທ້ອງຖິ່ນ ແລະ ເປັນບ່ອນອີງດ້ານຂໍ້ແນະນຳດ້ານກົດໝາຍ ເພື່ອຊ່ວຍໃຫ້ຂໍ້ມູນທີ່ຈຳເປັນໃນການຈັດຕັ້ງປະຕິບັດວຽກງານຕ່າງໆຂອງລັດຖະ ບານໃຫ້ສອດຄ່ອງຕາມລະບຽບຫຼັກການ ເປັນຕົ້ນ ແມ່ນການຄຸ້ມຄອງຊັບ ພະຍາ ກອນທຳມະຊາດ ແລະ ສິ່ງແວດລ້ອມແບບມີສ່ວນຮ່ວມ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍທຸກຮູບແບບ, ຮູບການແກ້ໄຂຂໍ້ຂັດແຍ້ງ ແລະ ການຄຸ້ມຄອງແຮງງານຂັ້ນບ້ານ, ການທົດແທນຄ່າເສຍຫາຍຂອງໂຄງການພັດທະນາ, ຂັ້ນຕອນການແກ້ໄຂຂໍ້ສະເໜີຂອງຜູ້ທີ່ໄດ້ຮັບຜົນກະທົບຈາກໂໂຄງການພັດທະນາ, ແລະ ສິດຂອງຜູ້ຮ້ອງ ທຸກໃນການເຂົ້າເຖິງຄວາມຍຸດຕິທຳ.

ເພື່ອແນ່ໃສ່ເຮັດໃຫ້ປະຊາຊົນບັນດາເຜົ່າໃນເຂດຫ່າງໄກສອກຫຼີກສາມາດເຂົ້າເຖິງຂໍ້ມູນຂ່າວສ່ານ, ມີສ່ວນຮ່ວມໃນການພັດທະນາແບບຍືນຍົງ, ປະກອບສ່ວນໂຄສະນາເຜີຍແຜ່ບັນດາລະບຽບການຂໍ້ກຳນົດ ແລະ ກົດໝາຍທີ່ພັກ-ລັດວາງອອກ ເພື່ອພ້ອມກັນຈັດຕັ້ງປະຕິບັດຢ່າງມີປະສິດທິຜົນ.

ພິທີນຳສະເໜີປະຕິທິນກ່ຽວກັບການເຜີຍແຜ່ຂໍ້ມູນດ້ານກົດໝາຍປະຈຳປີ 2018 ຈັດຂື້ນວັນທີ 19 ທັນວາ 2017 ຢູ່ທີ່ອົງການບ້ານຈຸດສຸມ (VFI) ນະຄອນຫຼວງວຽງຈັນ ມີທ່ານນາງ ເຊແລດສະຕິນ ໂກຮແຊວ ຜູ້ອຳ ນວຍການ ອົງການເຮວວີຕັດ ປະຈຳລາວ ທັງເປັນປະທານຄະນະບໍລິຫານງານ ກຸ່ມແລກປ່ຽນຂໍ້ມູນເລື່ອງທີ່ດິນ (LIWG), ບັນດາຫົວໜ້າອົງການຈັດຕັ້ງພາກລັດ, ຜູ້ປະສານງານໂຄງການ (LIWG) ແລະ ແຂກຖືກເຊີນເຂົ້າຮ່ວມ.

“ທາງທີມງານໄດ້ປຸກລະດົມ ໃຫ້ພວກເຮົາມີຄວາມຫ້າວຫັນໃນການປະກອບສ່ວນໃນຊ່ວງຝຶກອົບຮົມ”

ໂດຍ: ກອງເລຂາ LIWG

29 ພະຈິກ 2017

ໂຄງການສົ່ງເສີມການຮຽນຮູ້ກ່ຽວກັບທີ່ດິນເພື່ອເພີ່ມຄວາມໝັ້ນຄົງທາງດ້ານສະບຽງອາຫານ (LIFE) ເຊິ່ງເປັນໂຄງການພາຍໃຕ້ການລິເລີ່ມໂດຍ ກຸ່ມແລກປ່ຽນຂໍ້ມູນເລື່ອງທີ່ດິນ (LIWG) ໄດ້ຈັດ ກອງປະຊຸມ ກ່ຽວກັບ ຊຸມຊົນແຫ່ງການຮຽນຮູ້ ແລະ ການແລກປ່ຽນ (CoP) ໃນວັນທີ 28 ພະຈິກ 2017 ທີ່ ເຮືອນ ຮຽນຮູ້, ນະຄອນຫຼວງວຽງຈັນ

ພາຍໃນກອງປະຊຸມ ຄູ່ຮ່ວມງານຂອງໂຄງການ LIFE ກໍ່ໄດ້ເຂົາຮ່ວມ ເພື່ອແລກປ່ຽນກ່ຽວກັບບົດຮຽນ ແລະ ປະສົບການ ໂດຍສະເພາະແມ່ນຜົນໄດ້ຮັບຂອງໂຄງການ LIFE ທີ່ຮ່ວມງານການຝຶກອົບຮົມໃກ້ຊິດ ແກ່ບັນດາ ຄູ່ຮ່ວມງານ, ປຶກສາຫາລືກ່ຽວກັບຊ່ອງວ່າງ ແລະ ວິທີທາງໃນການແກ້ໄຂ ແລະ ເພື່ອ ວາງແຜນຮ່ວມກັນກ່ຽວກັບ ກິດຈະກຳບູລິມະສິດ ທີ່ທາງໂຄງການ LIFE ແລະ ຄູ່ມຮ່ວມງານ ຢາກຈະເຮັດວຽກຮ່ວມກັນໃນອະນາຄົດ.

ໃນກອງປະຊຸມ ທາງທີມງານ ກໍ່ຍັງໄດ້ ວາງສະແດງກ່ຽວກັບບັນດາ ເຄື່ອງມື ແລະ ເອກະສານຕ່າງໆ ເຊັ່ນ: ຮູບພາບ, ໂພສເຕີ, ວິດີໂອ ແລະ ວິທີ່ການການໃຊ້ເກມ ເຊື່ອມຫົວຂໍ້ຝຶກອົບຮົມກ່ຽວກັບ ທີ່ດິນ ແລະ ສັນຍາກະສິກຳ ທີ່ທາງທີມງານ ໄດ້ນຳໃຊ້ເຂົາໃນການຝຶກອົບຮົມ ແກ່ຄູ່ຮ່ວມງານ.

ໃນກອງປະຊຸມ ຄູ່ຮ່ວມງານຫຼາຍທ່ານ ກໍ່ໄດ້ເວົ້າເປັນສຽງດຽວກັນວ່າ ວິທີການຝຶກອົບຮົມຂອງ LIFE ແມ່ນເປັນວິທີການທີ່ດຶງດູດໃຫ້ທຸກຄົນມີສ່ວນຮ່ວມ ແລະ ທັງໄດ້ຄວາມຮູ້ ແລະ ຄວາມມ່ວນຊື່ນຕະຫຼຶດທັງຊ່ວງຂອງການຝຶກອົບຮົມໃນແຕ່ລະຄັ້ງ.  “ຕະຫຼອດຊ່ວງຝຶກອົບຮົມ ທາງທີມງານໄດ້ປຸກລະດົມ ໃຫ້ພວກເຮົາມີຄວາມຫ້າວຫັນໃນການປະກອບສ່ວນ ພ້ອມທັງໃຫ້ເຮັດພວກເຮົາເຂົ້າໃຈບັນຫາ ຜ່ານຂະບວນການຮຽນຮູ້ທີ່ສ້າງສັນຂອງທີມງານ, ຄູ່ຮ່ວມງານທ່ານໜຶ່ງຂອງໂຄງການ LIFE ກ່າວ.

ສຳມະນາວຽກງານທີ່ດິນ ແລະ ຊັບພະຍາກອນທຳມະຊາດໃຫ້ແກ່ ສສຊ ແລະ ສສຂ

ຂ່່າວຈາກ: ໜັງສືພິມ ຜູ້ແທນປະຊາຊົນ, ສະບັບວັນທີ 1-4/10/2017

(ສພຊ) ເພື່ອສ້າງຄວາມເຂົ້າໃຈຕໍ່ວຽກງານບໍລິຫານທີ່ດິນ ແລະ ຊັບພະຍາກອນທຳມະຊາດໃຫ້ມີຄວາມເລິກເຊິ່ງ, ສະຖາບັນຄົ້ນຄວ້ານິຕິກຳ ສະພາແຫ່ງຊາດ ໄດ້ຈັດກອງປະຊຸມສຳມະນາ ເພື່ອແລກປ່ຽນຄວາມຮູ້ ແລະ ບົດຮຽນກ່ຽວກັບການບໍລິຫານວຽກງານທີ່ດິນ ແລະ ຊັບພະຍາກອນທຳມະຊາດ ໃຫ້ແກ່ສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນຂັ້ນແຂວງ  (ສສຂ) ທີ່ ສູນ ຮ່ວມມືສາກົນ ແລະ ການຝຶກອົບຮົມ (ICTC) , ນະຄອນຫຼວງວຽງຈັນ ລະຫວ່າງວັນທີ 28-29 ກັນຍາ 2017, ພາຍໃຕ້ການເປັນປະທານຂອງທ່ານ ຄໍາເຜີຍ ປານມາໄລທອງ ຫົວໜ້າ ສະຖາບັນຄົ້ນຄວ້າ ນິຕິກຳແຫ່ງຊາດ; ມີບັນດາທ່ານ ສສຊ ແລະ ສສຂ, ປະທານ-ຮອງປະທານກຳມາທິການ, ຫົວໜ້າ-ຮອງຫົວໜ້າກົມ, ສູນ, ພະນັກງານພາຍໃນ ສພຊ, ຫົວໜ້າກົມນິຕິກຳ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ຕ່າງໜ້າຈາກກະຊວງທີ່ກ່ຽວຂ້ອງ,​ ຫົວໜ້າໂຄງການບ້ານຈຸດສຸມ (VFI), ຕ່າງໜ້າຈາກອົງການອາຫານ (FAO) ແລະ ຕ່າງໜ້າຈາກ (CAMKID)/OXFAM ເຂົ້າຮ່ວມທັງໝົດ 153 ທ່ານ.

ທັ້ງນີ້ ກໍ່ເພື່ອສະໜັບສະໜູນການປະກອບສ່ວນຄວາມຄິດເຫັນຂອງທ່ານ ສສຊ ແລະ ສສຂ ເຂົ້າໃນຮ່າງກົດໝາຍທີ່ດິນ (ສະບັບປັບປຸງ); ການໃຫ້ສຳປະທານ ແລະ ການໃຫ້ເຊົ່າທີ່ດິນ ໂດຍຜ່ານການສົນທະນາແລກປ່ຽນຄວາມຄິດເຫັນກັນ; ພ້ອມນັ້ນ ເພື່ອເຮັດໃຫ້ການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ອົງການຈັດຕັ້ງທາງສັງຄົມ ໃນການຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ບັນດານະໂຍບາຍກ່ຽວກັບທີ່ດິນໃຫ້ມີປະສິດທິພາບທີ່ເພີ່ມຂື້ນ; ເພື່ອຍົກລະດັບຄວາມຮູ້ ແລະ ປະສົບການກ່ຽວກັບວຽກງານການຄຸ້ມຄອງທີ່ດິນ ແລະ ຊັບພະຍາກອນທຳມະຊາດໃຫ້ແກ່ ສສຊ ແລະ ສສຂ ພ້ອມດ້ວຍພະນັກງານທີ່ເປັນເສນາທິການໃຫ້ແກ່ກຳມາທິການຕ່າງໆ.

ລາວຫາລືແຜນແມ່ບົດຈັດສັນທີ່ດິນແຫ່ງຊາດ

ແຫຼ່ງຂ່າວ: ໜັງສືພິມລາວພັດທະນາ

http://www.laophattananews.com/ລາວຫາລືແຜນແມ່ບົດຈັດສັນ/

ກອງປະຊຸມວິທະຍາສາດເພື່ອຄົ້ນຄວ້າ ແລະ ປະກອບຄຳເຫັນໃສ່ຮ່າງແຜນແມ່ບົດຈັດສັນທີ່ດິນແຫ່ງຊາດ ໄດ້ສໍາເລັດລົງເມື່ອບໍ່ດົນມານີ້, ໂດຍການເປັນປະ ທານຂອງທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ໃຫ້ກຽດເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຜູ້ຊີ້ນຳຄະນະສະເພາະກິດ ເພື່ອດຳເນີນການກວດກາ, ສຶກສາຄົ້ນຄວ້າ ແລະ ວິໄຈບັນຫາທີ່ດິນ.

ທ່ານລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໄດ້ ກ່າວວ່າ: ການສ້າງແຜນແມ່ບົດຈັດສັນທີ່ດິນແຫ່ງຊາດ ແມ່ນເພື່ອກຳນົດເຂດທົ່ວປະເທດຢ່າງເປັນລະບົບ ແນໃສ່ການວາງແຜນຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ທີ່ດິນຕາມຫລັກວິຊາການ ແລະ ລະບຽບກົດໝາຍ ເຮັດໃຫ້ທີ່ດິນ ກໍຄືຊັບພະຍາກອນທຳມະຊາດຕ່າງໆມີຄວາມຍືນຍົງ.

ແຂວງວຽງຈັນ ອະນຸຍາດ ໃຫ້ນັກລົງທຶນຈີນ ປູກໄມ້ໃຫ້ໝາກ ຢູ່ເມືອງຫີນເຫີບ 150 ເຮັກຕາ

ແຫຼ່ງທີ່ມາຂອງຂ່າວ: ຂ່າວສານປະເທດລາວ (KPL) 23/06/2017
http://kpl.gov.la/detail.aspx?id=25610
ແຂວງ​ວຽງ​ຈັນ, ​ອະນຸຍາດ​ໃຫ້​ນັກ​ລົງທຶນຈີນ ​​ເຂົ້າປູກ​ໄມ້​ໃຫ້​ໝາກ​ ແບບ​ປະສົມ​ປະສານ ​ຢູ່​ເມືອງ​ຫີນ​ເຫີບ​ ເຊິ່ງຈະ​ປູກ​ໝາກ​ມ່ວງ, ລີ້ນຈີ່​ ແລະ​ ລຳ​ໄຍ, ​ໂດຍ​ຈະ​ບໍ່​ປູກ​ກ້ວຍ ​​ເພື່ອຫວັງ​ຜົນ​ກຳ​ໄລ ​​ໃນ​ໄລຍະ​ສັ້ນ​ເດັດຂາດ, ຊຶ່ງພິທີ​ເຊັນ​ສັນຍາ​ອະນຸຍາດ ​ຢ່າງ​ເປັນ​ທາງ​ການ​ ມີ​ຂຶ້ນ​ໃນ​ວັນ​ທີ 22 ມິຖຸນາ​ ນີ້ ​ລະຫວ່າງ​ທ່ານ ສຸ​ກັນ​ ວິ​ໄລ ຫົວໜ້າ​ພະ​ແນ​ກ ​ແຜນການ-ການລົງທຶນ ​ແຂວງວຽງຈັນ ​ແລະ ​ທ່ານ​ ທາວ ​ຊິນ​ຍີ ປະທານ​ບໍລິສັດ ​ຊິນ​ຮວງ​ຕາວ​ຕີງ​ອີ້​ ການ​ຄ້າ​ຈຳກັດ ໂຄງການ​ດັ່ງກ່າວ, ​ມີ​ມູນ​ຄ່າ​ການ​ລົງທຶນ 1 ລ້ານ​ໂດ​ລາສະຫະລັດ.
ໃນ​ສັນຍາ​ລະ​ບຸ​ວ່າ:​ ໂຄງການ​ປູກ​ໄມ້​ໃຫ້​ໝາກ​ ແບບ​ປະສົມ​ປະສານ ປະກອບ​ມີ ການ​ປູກ​ໝາກມ່ວງ, ໝາກ​ລີ້ນຈີ່ ​ແລະ ​ໝາກ​ລຳ​ໄຍ. ​ຊຶ່ງຈະ​ຈັດ​ຕັ້ງ​ປະ​ຕິບັດ​ ຢູ່​ ບ້ານ​ຄອນ​ແກ້ວ​ ​ເມືອງ​ ຫີນ​ເຫີບ​ ແຂ​ວງ​ວຽງ​ຈັນ ໃນ​ເນື້ອ​ທີ່ 150 ເຮັກຕາ, ​ໂດຍ​ມີ​ໄລ​ຍະ ການ​ສຳປະທານ 30 ປີ​ ນັບ​ແຕ່​ມື້​ເຊັນ​ສັນຍາ ​ເປັນ​ຕົ້ນ​ໄປ ຫລັງ​ຈາກ​ນັ້ນ​ ແມ່ນ​ສົ່ງ​ດິນ​ດັ່ງກ່າວ ​ຄືນ​ໃຫ້​ລັດ.
ທ່ານ​ ທາວ ​ຊິນ​ຍີ ປະທານ​ບໍລິສັດ ​ຊິນ​ຮວງ​ຕາວ​ຕີງ​ອີ້​ ການ​ຄ້າ​ຈຳກັດ ກ່າວວ່າ:​ ໂຄງການ​ນີ້ ​ເປັນ​ໂຄງການ ​ປູກ​ໄມ້​ໃຫ້​ໝາກ​ ແບບ​ປະສົມ​ປະສານ​ ໂດຍ​ຈະ​ນຳ​ໃຊ້​ ເຕັກນິກ​ວິ​ທະ​ນາສາ​ດ ​ເຂົ້າ​ໃນ​ການ​ຜະລິດ, ບໍ່​​ໃຊ້​ເຄມີ​ທີ່​ເປັນ​ອັນຕະລາຍ ​ຜູ້​ທຳ​ການ​ຜະລິດ​, ຕໍ່​ປະຊາຊົນບໍ​ລິ​ເວນ​​ໃກ້​ຄຽງ​ ແລະ ​ໂຄງການ​ ຈະ​ບໍ່​ປູກ​ກ້ວຍ​ ທີ່​ໃຊ້​ສານ​ເຄມີ ​ເພື່ອ​ຫວັງຜົນ​ກຳ​ໄລ​ ໃນ​ໄລຍະ​ສັ້ນ​​ເດັດຂາດ.
ສ່ວນ​ການ​ປູກຕົວ​ຈິງ ແມ່ນ​ຈະ​ເລີ່​ມລົງມື ​ໃນ​ຕົ້ນ​ລະດູຝົນ​ປີໜ້າ, ​ໃນ​ຈຳນວນ 150​ ເຮັກ​ຕາ ​ແມ່ນ​ຈະ​ປູກໝາກມ່ວງ​ 50% ຂອງ​ເນື້ອ​ທີ່​ ຄາດ​ວ່າ 5 ປີ​ຈະ​ໄດ້​​ເກັບ​ຜົນ​ຜະລິດ​ຂາຍ, 70%​ ແມ່ນ​ສົ່ງ​ໄປ​ຈີນ ​ແລະ ​30%​ ແມ່ນ​ຂາຍ​ພາຍ​ໃນ, ສ່ວນດ້ານ​ແຮງ​ງານ ​ແມ່ນ​ຈະ​ນຳ​ໃຊ້​ປະຊາຊົນ ​ຢູ່​ບ້ານ​ຄອນ​ແກ້ວ​ ແລະ ​ບ້ານ​ໄດ້​ຄຽງ​, ຊຶ່ງ​ໂຄງການ​ດັ່ງກ່າວ ມີ​ຄວາມ​ຕ້ອງການ​ແຮງ​ງານ ​ຫລາຍ​ກວ່າ ​50 ຄົນ​, ສ່ວນ​ວິຊາ​ກການ​ແມ່ນ​ນຳ​ໃຊ້​ຄົນ​ຈີນ.

Powered by WordPress | Download Free WordPress Themes | Thanks to Themes Gallery, Premium Free WordPress Themes and Free Premium WordPress Themes