Working towards greater community control over land, forests and natural resources

ສະພາແຫ່ງຊາດ ທາບທາມຮ່າງກົດໝາຍ ວ່າດ້ວຍທີ່ດິນ

ຂ່າວໂດຍ: ຂ່າວສານປະເທດລາວ, ວັນທີ 18 ທັນວາ 2018 

ເບິ່ງແຫຼ່ງຂໍ້ມູນທີ່: http://kpl.gov.la/detail.aspx?id=42399

ການ​ດຳ​ເນີນກອງ​ປະຊຸມສະ​ໄໝສາມັນ​ ເທື່ອ​ທີ 6 ຂອງ​ສະພາ​ແຫ່ງ​ຊາດ ​ຊຸດ​ທີ VIII ໃນ​ຕອນ​ເຊົ້າ​​ວັນ​ທີ 18 ທັນວາ 2018, ທ່ານ ສົມ​ມາດ ພົນ​ເສນາ ລັດຖະມົນຕີ​ ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໄດ້​ສະ​ເໜີຮ່າງ​ກົດໝາຍ ວ່າ​ດ້ວຍ​ທີ່​ດິນສະບັບ​ປັບປຸງ ເພື່ອ​ເປັນ​ການ​ທາ​ບທາມ ​ແລະ ​ເປີດ​ໂອກາດ​ໃຫ້​ ບັນດາ​ສະມາຊິກ​ສະພາ​ແຫ່ງ​ຊາດ (ສສຊ) ປະກອບ​ຄຳ​ຄິດ​ຄຳ​ເຫັນຢ່າງ​ເລິກ​ເຊິ່ງ ​ແລະ ກົງ​ໄປ​ກົງ​ມາ ຕໍ່ຮ່າງ​ກົດໝາຍສະບັບ​ນີ້ ເພື່ອໃຫ້ມີເນື້ອໃນອຸດົມສົມບູນ, ຄົບຖ້ວນ, ທັງສອດຄ່ອງ ແລະ ສາມາດນຳໄປຈັດຕັ້ງປະຕິບັດ ໄດ້ໃນຕໍ່ໜ້າຢ່າງມີປະສິດທີຜົນ, ແຕ່​ຈະ​ບໍ່​ໄດ້​ຮັບ ຮອງ​ເອົາ​ໃນກອງ​ປະຊຸມ​ເທື່ອ​ນີ້.

 
ຮ່າງ​ກົດໝາຍສະບັບ​ນີ້, ປະກອບ​ມີ 15 ພາກ 28 ໝວດ ​ແລະ 160 ມາດຕາ​ມ, ​ເຊິ່ງ​ໄດ້​ກຳ ນົດ​ຫລັກການ, ລະບຽບການ ​ແລະ ມາດ​ຕະການ ​ໃນ​ການ​ຄຸ້ມ​ຄອງຕິດຕາມ​ກວດກາ ກ່ຽວກັບ​ວຽກງານ​ທີ່​ດິນ ​ເພື່ອ​ໃຫ້​ວຽກງານ​ດັ່ງກ່າວ ​ໄດ້​ຮັບ​ການຈັດ​ຕັ້ງ​ປະຕິບັດ ຢ່າງ​ມີ​ປະສິດທິ​ຜົນ, ​ແນ​ໃສ່​ເຮັດ​ໃຫ້​ມີ​ຄວາມ​ຮັບປະກັນ ​ໃນ​ການ​ນຳ​ໃຊ້​ທີ່​ດິນ ຖືກຕ້ອງຕາ​ມ​ເປົ້າໝາຍ ​ເຮັດ​ໃຫ້​ຊີວິດ​ການ​ເປັນ​ຢູ່ ​ຂອງ​ປະຊາຊົນ​ດີ​ຂຶ້ນ, ສັງຄົມ​ມີ​ຄວາມ​ສະຫງົບ, ມີ​ຄວາມ​ເປັນ​ລະ​ບຽບ​ຮຽບຮ້ອຍ ​ແລະ ຍຸຕິ​ທຳ ປະກອບສ່ວນ​ເຂົ້າ​ໃນ ​ການ​ພັດທະນາ ​ເສດຖະກິດ-ສັງຄົມ ຂອງ​ຊາດຕາມ​ທິດ​ສີຂຽວ ​ແລະ ຍືນ​ຍົງ, ທັງ​ປົກ​ປັກ​ຮັກສາ​ສິ່ງ​ແວດ​ລ້ອມ ​ແລະ ​ເຂດ​ນ້ຳ​ແດນ​ດິນ ຂອງ ສປປ ລາວ.
ທ່ານ ສົມ​ມາດ ພົນ​ເສນາ ໃຫ້​ຮູ້​ວ່າ: ໃນ​ຍຸກ​ເຊື່ອມ​ໂຍງ​ກັບ​ພາກ​ພື້ນ  ແລະ ສາ​ກົນ, ມີ​ຄວາມ​ຈຳ​ເປັນ​ຕ້ອງ​ມີກົດ​ໝາຍ, ລະ​ບຽບ​ການ​ທີ່​ສອດ​ຄ່ອງ​​ ກັບ​ສະ​ພາບ​ການ​ພັດ​ທະ​ນາ​ ເສດ​ຖະ​ກິດ-ສັງ​ຄົມຂອງ ​ສ​ປ​ປ ລາວ.ກົດ​ໝາຍ​ວ່າດ້ວຍ ທີ່​ດິນສະ​ບັບ​ປັດ​ຈຸ​ບັນ ​ໄດ້​ປະ​ກາດ​ໃຊ້ ​ແຕ່​ປີ 2003 ເປັນ​ຕົ້ນ​ມາ ເຊິ່ງ​​ໄດ້​ປະ​ກອບ​ສ່ວນ ​ເຮັດ​ໃຫ້​ການ​ຄຸ້​ມຄອງ, ບໍ​ລິ​ຫານ​ທີ່​ດິນ​ໄດ້​ດີ​ພໍ​ສົມ​ຄວນ ແລະ ມີ​ຜົນ​ສຳ​ເລັດຫລາຍ​ດ້ານ ເຊັ່ນ: ການ​ພັດ​ທະ​ນາ ​ເສດ​ຖະ​ກິດ-ສັງ​ຄົມ​ ຂອງ​ປະ​ເທດ​ ໄດ້​ມີ​ບາດ​ກ້າວ​ຂະ​ຫຍາຍ​ຕົວ​ໄວ, ທັງຕອບສະໜອງ ຄວາມ​ຕ້ອງ​ການ​ນຳ​ໃຊ້​ທີ່​ດິນ ​ເຂົ້າ​ໃນ​ການ​ດຳ​ລົງ​ຊີ​ວິດ, ທຳ​ມາ​ຫາ​ກິນ ແລະ ການ​ພັດ​ທະ​ນາ​ເສດ​ຖະ​ກິດ​-ສັງ​ຄົມ. ປະ​ຊາ​ຊົນ​ລາວ​ບັນ​ດາ​ເຜົ່າ ມີ​ຄວາມ​ຕື່ມ​ຕົວ​ເປັນ​ເຈົ້າ​ຕໍ່ ​ດິນດອນ​ຕອນ​ຫຍ້າ, ປົກ​ປັກ​ຮັກ​ສາ, ນຳ​ໃຊ້ ແລະ ມີ​ການ​ພັດ​ທະ​ນາ​ທີ່​ດິນຫລາຍ​ຂຶ້ນ ເພື່ອ​ນຳ​ຜົນ​ປະ​ໂຫຍດ​ໃຫ້​ຄອບ​ຄົວ ແລະ ປະ​ເທດ​ຊາດ. ລັດ ແລະ ປະ​ຊາ​ຊົນ ໄດ້​ນຳ​ໃຊ້​ທີ່​ດິນ​ ເຂົ້າ​ໃນ​ເປົ້າ​ໝາຍ​ຕ່າງໆ​ ເຊັ່ນ: ​ທີ່​ດິນສຳ​ລັບ​ກະ​ສິ​ກຳ, ເປັນ​ດິນ​ປ່າ​ໄມ້, ອຸດ​ສາ​ຫ​ະ​ກຳ, ປຸກ​ສ້າງ ແລະ ມີ​ການ​ຊື້​-ຂາຍ ແລກ​ປ່ຽນເປັນຫລັກ​ຊັບ​ຄ້ຳ​ປະ​ກັນ, ການ​ເຊົ່າ ແລະ ການ​ສຳ​ປະ​ທານ​ທີ່​ດິນ ​ເຮັດ​ໃຫ້​ລາຍ​ຮັບ​ຈາກ​ທີ່​ດິນ​ເພີ່ມ​ຂຶ້ນ; ລະ​ບົບ​ການ​ຈັດ​ຕັ້ງ ແລະ ການ​ຄຸ້ມ​ຄອງ​ທີ່​ດິນ​ ໄດ້​ຮັບ​ການ​ປັບ​ປຸງ​ດີ​ຂຶ້ນ ດ້ວຍ​ການ​ແບ່ງ​ຂັ້ນ​ຄຸ້ມ​ຄອງ ​ລະ​ຫວ່າງ​ສູນ​ກາງ​ກັບ​ທ້ອງ​ຖິ່ນ ໂດຍ​ກຳ​ນົດ​ຂອບ​ເຂດ​ສິດໜ້າ​ທີ່ ​ໃນ​ການ​ຄຸ້ມ​ຄອງ​ ລະ​ຫວ່າງ​ຂະ​ແໜງ​ການ ​ແຕ່​ລະ​ຂັ້ນ​ຈະ​ແຈ້ງ​ສົມ​ຄວນ. ຜ່ານ​ການ​ຈັດ​ຕັ້ງ​ປະ​ຕິ​ບັດກົດ​ໝາຍ​ ວ່າ​ດ້ວຍ​ທີ່​ດິນ​ມາເປັນເວລາ 15 ປີ ເຫັນ​ໄດ້ວ່າໂຄງ​ສ້າງ ແລະ ເນື້ອ​ໃນ​ຂອງ​ກົດ​ໝາຍ​ ມາ​ຮອດ​ປັດ​ຈຸ​ບັນ ​ຍັງ​ມີ​ຊ່ອງ​ຫວ່າງ ບໍ່​ທັນ​ຄົບ​ຖ້ວນ ແລະ ຈະ​ແຈ້ງ, ມີ​ບັນ​ຫາ​  ໃໝ່ຫລາຍ​ປະ​ການ​ເກີດ​ຂຶ້ນ ຈຶ່ງ​ເຮັດ​ໃຫ້​ມີ​ຄວາມ​ເຂົ້າ​ໃຈ​ແຕກ​ຕ່າງ​ກັນ ເປັນ​ສາ​ເຫດ​ໃຫ້​ການ​ນຳ​ເອົາ​ ກົດ​ໝາຍ​ໄປ​ຈັດ​ຕັ້ງ​ປະ​ຕິ​ບັດ ​ບໍ່​ເປັນ​ເອ​ກະ​ພາບ​ກັນ​ໃນຫລາຍ​ດ້ານ. ເມື່ອກົດໝາຍສະບັບນີ້ ຖືກຮັບຮອງ ແລະ ປະກາດໃຊ້ແລ້ວ​ ຈະ​ເຮັດ​ໃຫ້​ການ ​ຄຸ້ມ​ຄອງ-ບໍ​ລິ​ຫານ​ທີ່​ດິນ ​ຂອງ​ອົງ​ການ​ລັດ​ ມີ​ຄວາມ​ຈະ​ແຈ້ງ ແລະ ເປັນ​ລະ​ບົບ​ຄົບ​ຊຸດ​ຍິ່ງ​ຂຶ້ນ​.

ບັນດາ ສສຊ ໄດ້ຜັດປ່ຽນກັນ​​ປະກອບຄຳຄິຄຳເຫັນ ໃສ່ຮ່າງກົດໝາຍສະບັບດັ່ງກ່າວໂດຍ ລວມແລ້ວແມ່ນເຫັນດີ ເປັນເອກະພາບນຳຮ່າງ ກົດໝາຍສະບັບດັ່ງກ່າວແຕ່ມີບາງຈຸດບາງພາກບາງໝວດ ແລະ ບາງມາດຕາ ແມ່ນຍັງບໍໍ່ທັນສອດຄ່ອງ. ດັ່ງນັ້ນ, ຈຶ່ງໄດ້ສະເໝີ ໃຫ້ຄະນະຮັບຜິດຊອບ ປັບປຸງບາງຈຸດ, ບາງພາກບາງໝວດ ແລະ ບາງມາດຕາ ເພື່ອເຮັດໃຫ້ມີເນື້ອໃນຮັດກຸມຄົບຖ້ວນ, ຈະແຈ້ງຖືກຕ້ອງ ແລະ ແທດເໝາະກັບການ ເຄື່ອນໄຫວວຽກງານໃນໄລຍະໃໝ່.

You can skip to the end and leave a response. Pinging is currently not allowed.

Leave a Reply

*

Powered by WordPress | Download Free WordPress Themes | Thanks to Themes Gallery, Premium Free WordPress Themes and Free Premium WordPress Themes