ຮ່າງກົດໝາຍວ່າດ້ວຍທີ່ດິນສະບັບປັບປຸງໄດ້ເພີ່ມເນື້ອໃນເຂົ້າເກືອບຮ້ອຍມາດຕາ | Land Info Working Group
ກຸ່ມແລກປ່ຽນຂໍ້ມູນເລື່ອງທີ່ດິນ - ແນໃສ່ສົ່ງເສີມ ຄວາມເຂົ້າໃຈ ແລະຄວາມຮູ້ທ່ວງທັນ ໃນດ້ານ ເສດຖະກິດສັງຄົມ ສິ່ງແວດລ້ອມ ທີ່ກ່ຽວຂ້ອງກັບການນຳໃຊ້ເນື້ອທີ່ດິນ ໃນໂຄງການ ຕ່າງໆ, ໂດຍການເກັບກຳ ແລະ ແລກປ່່ຽນ ຂໍ້ມູນ ຂ່າວສານ, ການສົນທະນາປຶກສາຫາລື ແລະ ການຄົ້ນຄວ້າວິໃຈ

ຮ່າງກົດໝາຍວ່າດ້ວຍທີ່ດິນສະບັບປັບປຸງໄດ້ເພີ່ມເນື້ອໃນເຂົ້າເກືອບຮ້ອຍມາດຕາ

ຂ່າວໂດຍ ໜັງສືພິມລາວພັດທະນາ, ວັນທີ 11 ມີນາ 2018

www.laophattananews.com/archives/29022

ຮ່າງກົດໝາຍວ່າດ້ວຍທີ່ດິນສະບັບປັບປຸງໃໝ່ໄດ້ເພີ່ມເນື້ອໃນເຂົ້າຕື່ມເກືອບຮ້ອຍມາດຕາຄື ຈາກເດີມມີພຽງ 6 ພາກ, 14 ໝວດ ແລະ 87 ມາດຕາ ມາເປັນ 14 ພາກ, 32 ໝວດ ແລະ 183 ມາດຕາ ແລະ ເມື່ອທ້າຍອາທິດທີ່ຜ່ານມາ ກໍ່ໄດ້ມີກອງປະຊຸມເປີດກວ້າງທາບທາມຜ່ານຮ່າງກົດໝາຍດັ່ງກ່າວ, ໂດຍການເປັນປະທາານຂອງທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ເພື່ອທົບທວນການຜັນຂະຫຍາຍມະຕິຂອງຄະນະບໍລິຫານງານສູນກາງພັກວ່າດ້ວຍ ການເພີ່ມທະວີວຽກງານຄຸ້ມຄອງ ແລະພັດທະນາທີ່ດິນໄລຍະໃໝ່ ແລະ ປຶກສາຫາລື, ຄົ້ນຄວ້າປະກອບຄຳຄິດເຫັນໃສ່ເນື້ອໃນຂອງຮ່າງກົດໝາຍວ່າດ້ວຍທີ່ດິນສະບັບປັບປຸງ ເພື່ອໃຫ້ມີເນື້ອໃນຄົບຖ້ວນ, ສົມບູນ ແລະະ ເປັນເອກະພາບກັນໃນດ້ານຫຼັກການ, ກ່ອນຈະສະເໜີໃຫ້ກະຊວງຍຸຕິທຳກວດກາຄວາມສອດຄ່ອງທາງດ້ານກົດໝາຍ ແລະ ສະເໜີລັດຖະບານຮັບຮອງເອົາໃນກອງປະຊຸມລັດຖະບານປະຈຳເດືອນພຶດສະພາ ແລະ ນຳສະເໜີຕໍ່ກອງປະຊຸມສະໄໝສາມັນຄັ້ງທີ 6 ຂອງສະພາແຫ່ງຊາດຊຸດທີ VIII ພິຈາລະນາຮັບຮອງເອົາ.

ທ່ານລັດຖະມົນຕີກະຊວວງຊັບພະຍາກອນທຳມະຊາດ ແລະ ສິ່ງແວດລ້ອມ ກ່າວວ່າ: ໃນໄລຍະຜ່ານມາ, ພັກ ແລະ ລັດຖະບານໄດ້ມີນະໂຍບາຍ, ກົດໝາຍ ແລະ ລະບຽບການຕ່າງໆເພື່ອຄຸ້ມຄອງກ່ຽວກັບທີ່ດິນ, ເພື່ອຮັບປະກັນໃຫ້ປະຊາຊົນບັນດາເຜົ່າມີຄວາມຕື່ນຕົວເປັນເຈົ້າຂອງທີ່ດິນ, ປົກປັກຮັກສາ, ນໍາໃຊ້ ແລະ ມີການພັດທະນາທີ່ດິນຫຼາຍຂື້ນ, ໂດຍສະເພາະນຳໃຊ້ການຜະລິດກະສິກຳ, ປ່າໄມ້, ອຸດສາຫະກຳ, ປຸກສ້າງ ແລະ ອື່ນໆ ເພື່ອນໍາຜົນປະໂຫຍດມາສູ່ໃຫ້ຕົນເອງ ແລະ ປະເທດຊາດ.

ແຕ່ໃນຕົວຈິງແລ້ວເຫັນວ່າການຄຸ້ມຄອງທີ່ດິນຍັງເກີດມີຫຼາຍບັນຫາສັບສົນ ເປັນຕົ້ນ: ການຫັນປ່ຽນປະເພດທີ່ດິນ ຍັງບໍ່ປະຕິບັດຕາມກົດໝາຍເຂັ້ມງວດ: ການສ້າງແຜນແມ່ບົດຈັດສັນທີ່ດິນແຫ່ງຊາດ ແລະ ວາງແຜນນໍາໃຊ້ທີ່ດິນຂອງຂະແໜງການຍັງບໍ່ທັນສຳເລັດ, ພາໃຫ້ເກີດສະພາບການນຳໃຊ້ທີ່ດິນມີລັກສະນະຟູມເຟືອຍ, ມີການຈັບຈ່ອງທີ່ດິນ ແລະ ປ່າແບບຊະຊາຍ, ມີການແບ່ງປັນທີ່ດິນຂອງລັດໃຫ້ບຸກຄົນຖືສິດນໍາໃຊ້ຂາດຕົວບໍ່ຖືກຕ້ອງຕາມລະບຽບກົດໝາຍແຜ່ຫຼາຍໃນເງື່ອນໄຂທີ່ລາຄາດິນນັບມື້ນັບສູງຂື້ນ, ໂດຍສະເພາະແມ່ນດິນເຂດຕົວເມືອງ, ການຊື້-ຂາດສິດນໍາໃຊ້ທີ່ດິນຖືກຮົ່ວໄຫລຢ່າງໜັກໜ່ວງ, ອັນກໍ່ໃຫ້ເກີດມີການຮ້ອງຟ້ອງເປັນຄະດີຄວາມກ່ຽວກັບທີ່ດິນນັບມື້ນັບຫຼາຍຂື້ນ. ດັ່ງນັ້ນ ການເພີ່ມທະວີຄຸ້ມຄອງທີ່ດິນຕາມກົດໝາຍເຂັ້ມງວດນັ້ນ ແມ່ນມີຄວາມຈຳເປັນຮີບດ່ວນເພື່ອແກ້ໄຂບັນຫາທີ່ເກີດຂື້ນ, ໂດຍເລີ່ມຈາກການຮັບປະກັນການປະຕິບັດພາລະບົດບາດຄຸ້ມຄອງຂອງລັດ ແລະ ຄວາມສັກສິດຂອງກົດໝາຍ ເພື່ອແກ້ໄຂບັນຫາທີ່ເປັນຊ່ອງຫວ່າງຕ່າງໆ ແລະ  ປາກົດການຫຍໍ້ທໍ້ຕ່າງໆ ກໍ່ຄືຂໍ້ຂັດແຍ້ງກ່ຽວກັບທີ່ດິນໃຫ້ຖືກຕ້ອງຕາມກົດໝາຍ.

You can skip to the end and leave a response. Pinging is currently not allowed.

Leave a Reply

*

Powered by WordPress | Download Free WordPress Themes | Thanks to Themes Gallery, Premium Free WordPress Themes and Free Premium WordPress Themes