Working towards greater community control over land, forests and natural resources

ທ່ານນາຍົກເນັ້ນທີ່ດິນເປັນບັນຫາຮີບດ່ວນທີ່ຈະຕ້ອງສືບຕໍ່ແກ້ໄຂ

ແຫຼ່ງທີ່ມາຂອງຂ່າວ: ໜັງສືພິມເສດຖະກິດ-ການຄ້າ,  7/5/2017

https://laoedaily.com.la/2017/05/ລັດຖະບານຍົກທີ່ດິນເປັນບ/

ບັນຫາທີ່ດິນຍັງເປັນບັນຫາເຄັ່ງຮ້ອນມາຢ່າງຕໍ່ເນື່ອງ ເຊິ່ງກອງປະຊຸມສະໄໝສາມັນຂອງສະພາແຫ່ງຊາດໃນຊຸດຜ່ານໆມາ ກໍ່ໄດ້ຍົກບັນຫາດັ່ງກ່າວ ຖາມເຈາະຈີ້ມຂະແຫນງທີ່ກ່ຽວຂ້ອງຢ່າງຕໍ່ເນື່ອງ. ລ້າສຸດໃນກອງປະຊຸມຄັ້ງນີ້ ສະມາຊິກສະພາແຫ່ງຊາດ ກໍ່ໄດ້ຕັ້ງຄໍາຊັກຖາມວ່າ: ບັນຫາການໃຫ້ຊຳປະທານທີ່ດິນ ໃຫ້ກັບບໍລິສັດເອກະຊົນ ທັງພາຍໃນ ແລະ ແຕ່ງປະເທດ ແຕ່ບໍລິສັດບໍ່ປະຕິບັດຕາມສັນຍາ (ຈັດຈອງທີ່ດິນແຕ່ບໍ່ພັດທະນາ?) ບັນຫາບໍລິສັດຂະຫຍາຍເນື້ອທີ່ເກີນກຳນົດທີ່ ພາກລັດອະນຸມັດ ເຮັດໃຫ້ປະຊາຊົນໄດ້ຮັບຜົນກະທົບ ແລະ ບັນຫາທີ່ລັດຖະບານອະນຸມັດທີ່ດິນສພຳປະທານໃຫ້ບໍລິສັດຢູ່ໃນເຂດທ້ອງຖິ່ນ ແຕ່ບໍລິສັດເຮັດຕາມໃຈ ບໍ່ຮັບຟັງອຳນາດ ການປົກຄອງທ້ອງຖິ່ນ ເນື່ອງຈາກເປັນໂຄງການທີ່ໄດ້ຮັບອະນຸມັດຈາກລັດຖະບານ, ທາງລັດຖະບານຈະມີວິທີແກ້ໄຂ ແລະ ມາດຕະການຈັດຕັ້ງປະຕິບັດຄືແນວໃດ?.

ຕໍ່ກັບບັນຫາດັ່ງກ່າວ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຊີ້ແຈງຕໍ່ບັນດາ ສສຊ ວ່າ: ບັນຫານການສຳປະທານທີ່ດິນໃຫ້ແກ່ບໍລິສັດລົງທຶນພາຍໃນ ແລະ ຕ່າງປະເທດທີ່ລັດຖະບານ ຫຼື ແຂວງໄດ້ອະນຸມັດ ປັດຈຸບັນມີຫຼາຍບໍລິສັດໄດ້ຮັບອະນຸຍາດ ສຳປະທານແຕ່ບໍ່ປະຕິບັດຕາມລະບຽບກົດໝາຍ, ລະບຽບການທີ່ກ່ຽວຂ້ອງ, ສັນຍາສຳປະທານ ແລະ ອື່ນໆ; ການບຸກເບີກເນື້ອທີ່ ບໍ່ໄດ້ຮັບອະນຸມັດກໍ່ມີ, ລ່ວງລໍ້າກໍ່ມີ, ກວມເອົາດິນຂອງປະຊາຊົນ, ການພັດທະນາບໍ່ໄປຕາມກຳນົດເວລາ ແລະ ເງືື່ອນໄຂຂອງສັນຍາສຳປະທານ ແລະ ອື່ນໆ.

ທ່ານກ່າວຕື່ມວ່າ: ບັນຫາດັ່ງກ່າວນີ້ແມ່ນມີມາແຕ່ດົນ, ລັດຖະບານຊຸດຜ່ານໆມາກໍ່ໄດ້ພະຍາຍາມແກ້ໄຂ ແຕ່ວ່າຍັງຫຼາຍອັນທີ່ຈະຕ້ອງໄດ້ສືບຕໍ່ແກ້ໄຂ. ລັດຖະບານໄດ້ນຳເອົາບັນຫາທີ່ດິນຂື້ນມາເພື່ອສຶກສາຄົ້ນຄວ້າວ່າ: ການປະຕິບັດກົດໝາຍທີ່ດິນຂອງພວກເຮົາມີ ຈຸດດີ, ຈຸດອ່ອນ ແລະ ຂໍ້ບົກຜ່ອງແນວໃດ? ເຊິ່ງມີຫຼາຍຂໍ້ຈຸດອ່ອນ ແລະ ຂໍ້ບົກຜ່ອງ, ບັນຫາທີ່ຟົດຮ້ອນກໍ່ຄື: ແຂວງມີສິດອະນຸຍາດເທົ່ານັ້ນ ແຕ່ປະຕິບັດຈິງແມ່ນກາຍກັບໂຕທີ່ກຳນົດ, ຕະຫຼອດຮອດເມືອງ ແລະ ບ້ານກໍ່ມີສິດເຊັນໃຫ້ສຳປະທານທີ່ດິນເປັນຕົ້ນ.

ສ່ວນນັດທຸລະກິດສຳປະທານທີ່ດິນ ແຕ່ບໍ່ພັດທະນາຕາມສັນຍາໃຫ້ທ້ອງຖິ່ນລາຍງານຕໍ່ ລັດຖະບານໃຫ້ລົງໄປແກ້ໄຂ ແຕ່ບັນຫາເກີດຂື້ນຜ່ານມານັກລົງທຶນທີ່ໄດ້ສຳປະທານເຂົາເຈົ້າບໍ່ເຄົາລົບການຈັດຕັ້ງທ້ອງຖິ່ນ ເນື່ອງຈາກລັດຖະບານເປັນຜູ້ອະນຸມັດ.

ຕໍ່ໄປນີ້ໂຄງການສຳປະທານທີ່ດິນ, ການເຊັນສັນຍາສຳປະທານທີ່ດິນກໍ່ຕາມ, ການເຮັດໂຄງການໃນທ້ອງຖິ່ນໃດກໍ່ຕາມ, ລັດຖະບານອະນຸຍາດກໍ່ຕາມ, ການເຊັນສັນຍາແບບນີ້ຕ້ອງມີທ້ອງຖິ່ນເຂົ້າຮ່ວມນໍາ ແລະ ເຊັນນຳກັນ ເນື່ອງຈາກຜ່ານມາທ້ອງຖິ່ນມີສິດຄຸ້ມຄອງແບບນີ້ ແລະ ລັດຖະບານມີສິດຄຸ້ມຄອງແບບນີ້, ພວກເຮົາມອບສິດໃຫ້ທ້ອງຖິ່ນມີຄວາມຮັບຜິດຊອບສູງຕໍ່ບັນຫານີ້, ນາຍຍົກກ່າວ.

ຕໍ່ກັບບັນຫາທີ່ດິນ ໃນກອງປະຊຸມລັດຖະບານສະໄໝສາມັນປະຈຳເດືອນ ມັງກອນ 2017 ນາຍົກລັດຖະມົນ ຕີ ກໍ່ໄດ້ແຕ່ງຕັ້ງຄະນະສະເພາະກິດໜຶ່ງຂື້ນ ເພື່ອສຶກສາ ແລະ ວິເຄາະ – ວິໄຈບັນຫາທີ່ດິນໃຫ້ເລິກເຊິ່ງ ໂດຍມອບໃຫ້ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີເປັນຜູ້ຊີ້ນໍາ, ມີລັດຖະມົນຕີກະຊວງຊັບພະຍາ ກອນທຳມະຊາດ ແລະ ສິ່ງແວດລ້ອມເປັນຫົວໜ້າຄະນະ, ມີບັນດາຮອງລັດຖະມົນຕີກະຊວງກ່ຽວຂ້ອງປະກອບເປັນຄະນະ, ມີກອງເລຂາປະຈຳຢູ່ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ມີງົບປະມານໃນການເຄື່ອນໄຫວປະຕິໜ້າທີ່ ແລະ ຄວາມຜິດຊອບຂອງຄະນະ.

ໂດຍມອບໃຫ້ຄະນະທີ່ຖືກແຕ່ງຕັ້ງ ສຶກສາ, ວິເຄາະ – ວິໄຈບັນຫາທີ່ດິນໃຫ້ລະອຽດ, ເລິກເຊິ່ງ, ພ້ອມທັງເບິ່ງບົດຮຽນຂອງປະເທດເພື່ອນມິດສາກົນ, ຄາດໝາຍໃນການເຮັດວຽກຂອຄະນະໃຫ້ສຳເລັດ ແລະ ສາມາດລາຍງານລັດຖະບານຢ່າງຊ້າ ພາຍໃນເດືອນຕຸລາ 2017, ກ່ອນຈະນຳສະເໜີກອງປະຊຸມກົມການເມືອງ ສູນກາງພັກ ແລະ ກອງປະຊຸມສະພາແຫ່ງຊາດພິຈາລະນາ.

ພ້ອມທັງມອບໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມສືບຕໍ່ຕິດຕາມກ່ຽວກັບສະພາບບັນຫາການຄຸ້ມຄອງ, ນໍາໃຊ້, ການເຊົ່າ, ສຳປະທານ ແລະ ການບຸກລຸກທີ່ດິນປ່າສະຫງວນ, ປ່າຕົ້ນນໍ້າ, ຊັບພະຍາກອນທຳມະຊາດອື່ນໆທີ່ບໍ່ຖືກຕ້ອງໃນຂອບເຂດທົ່ວປະເທດຢ່າງເປັນປົກກະຕິ, ມີການລາຍງານໃຫ້ລັດຖະບານຮັບຊາບ ແແລະ ສະເໜີທິດທາງແກ້ໄຂເປັນແຕ່ລະໄລຍະ.

You can skip to the end and leave a response. Pinging is currently not allowed.

Leave a Reply

*

Powered by WordPress | Download Free WordPress Themes | Thanks to Themes Gallery, Premium Free WordPress Themes and Free Premium WordPress Themes