ກຸ່ມແລກປ່ຽນຂໍ້ມູນເລື່ອງທີ່ດິນ - ແນໃສ່ສົ່ງເສີມ ຄວາມເຂົ້າໃຈ ແລະຄວາມຮູ້ທ່ວງທັນ ໃນດ້ານ ເສດຖະກິດສັງຄົມ ສິ່ງແວດລ້ອມ ທີ່ກ່ຽວຂ້ອງກັບການນຳໃຊ້ເນື້ອທີ່ດິນ ໃນໂຄງການ ຕ່າງໆ, ໂດຍການເກັບກຳ ແລະ ແລກປ່່ຽນ ຂໍ້ມູນ ຂ່າວສານ, ການສົນທະນາປຶກສາຫາລື ແລະ ການຄົ້ນຄວ້າວິໃຈ

ຈັດສັນທຶນ ເພື່ອຈ່າຍທົດແທນຄືນ ​ໃຫ້ແກ່ຜູ້ທີ່ໄດ້ຮັບຜົນກະທົບຈາກ​ໂຄງການສ້າງທາງລົດໄຟ

ໜັງສືພີມວຽງຈັນທາມສ ວັນທີ 27/09/2016,

ສົມສັກ ປອງຂາວ

 

ລັດຖະບານ ໄດ້ຈັດສັນ ທຶນຈໍານວນ 5 ຕື້ກີບ ໃຫ້ແກ່ບັນດາອໍານາດການປົກຄອງ ເພື່ອ ຈ່າຍທົດແທນຄືນ ໃຫ້ແກ່ຜູ້ທີ່ຈະເສຍທີ່ດິນ ເມື່ອມີການກໍ່ສ້າງທາງລົດໄຟ.

ເຖິງຢ່າງໃດກໍ່ຕາມ, ການຈ່າຍຕົວຈິງ ແມ່ນຈະໄດ້ຮັບການປະຕິບັດໂດຍ ບໍລິສັດຮ່ວມທຶນ ທີ່ສ້າງສ້າງທາງລົດໄຟ, ຈາກງົບປະມານຂອງໂຄງການ ເກືອບ 6 ຕື້ ໂດລາອາເມລິກາ.

ການຈ່າຍທົດແທນຄືນ ແລະ ການປັກຫຼັກໝາຍ ເສັ້ນທາງລົດໄຟ ຕ້ອງໃຫ້ສໍາເລັດໄວທີ່ສຸດເທົ່າທີ່ສາມາດເຮັດໄດ້ ເພື່ອເຮັດໃຫ້ ການກໍ່ສ້າງທາງລົດໄຟປະຫວັດສາດດັ່ງກ່າວສາມາດເລີ່ມຕົ້ນໄດ້ໃນເດືອນ ທັນວານີ້.

ການປັກຫຼັກໝາຍລະອຽດ ຂອງຂອບເຂດໂຄງການ ຜ່ານ ສະຖານີລົດໄຟ ໃນ ເມືອງ ວັງວຽງ, ເມືອງ ຫຼວງພະບາງ ແລະ ແຂວງອຸດົມໄຊ ແມ່ນມີຄວາມຈໍາເປັນຫຼາຍ ກ່ອນການກໍ່ສ້າງຈະສາມາດເລີ່ມຕົ້ນ.

ເມື່ອການກໍ່ສ້າງສໍາເລັດ, ທາງລົດໄຟດັ່ງກ່າວ ຈະເຊື່ອມຕໍ່ ນະຄອນຫຼວງວຽງຈັນ ກັບ ຊາຍແດນຈີນ ໃນໄລຍະທາງ 427 ກິໂລແມັດ.

ປະຈຸບັນ, ບັນດາອົງການລັດຖະບານ ກໍາລັງຈັດສໍາມະນາຕ່າງໆ ເພື່ອ ແຈ້ງການໃຫ້ບັນດາພະນັກງານຊາບ ກ່ຽວກັບຄວາມສໍາຄັນ ແລະ ຜົນປະໂຫຍດທາງດ້ານເສດຖະກິດ ຂອງທາງລົດໄຟ ຕໍ່ປະເທດລາວ.

ກະຊວງການຕ່າງປະເທດ ໄດ້ຈັດສໍາມະນາຂື້ນ ໃນນະຄອນຫຼວງວຽງຈັນ ໃນອາທິດທີ່ຜ່ານມາ, ເຊິ່ງນໍາສະເໜີໂດຍ ຮອງລັດຖະມົນຕີກະຊວງການຕ່າງປະເທດ ທ່ານ ແສງເພັດ ຮຸ່ງບຸນຫວາງ.

ທ່ານ ແສງເພັດ ໄດ້ກ່າວວ່າ ທາງລົດໄຟ ແມ່ນເປັນ ສ່ວນທີ່ສໍາຄັນທີ່ສຸດ ຂອງຄວາມພະຍາຍາມທີ່ຈະ ຫັນປ່ຽນປະເທດລາວ ຈາກ ປະເທດທີ່ບໍ່ມີທາງອອກສູ່ທະເລ ມາເປັນ ປະເທດເຊື່ອມຕໍ່ ເພື່ອສົ່ງເສີມການພັດທະນາດ້ານເສດຖະກິດ ແລະ ສັງຄົມ. ການເຊື່ອມຕໍ່ທາງລົດໄຟ ຈະຊ່ວຍຕັດ ຄ່າໃຊ້ຈ່າຍດ້ານຄ່າຂົນສົ່ງ ແລະ ສົ່ງເສີມ ການຜະລິດ ເປັນສິນຄ້າ ເພື່ອສົ່ງອອກ.

ຜູ້ອໍານວຍການ ໂຄງການກໍ່ສ້າງທາງລົດໄຟ ລາວ-ຈີນ ແລະ ທັງເປັນຜູ້ອໍານວຍການບໍລິສັດທາງລົດໄຟແຫ່ງຊາດລາວ ດຣ ກຸ້ງ ສຸກອາລຸນ ໄດ້ໃຫ້ສໍາພາດຕໍ່ ໜັງສືພິມວຽງຈັນທາມສ ໃນໄວໆນີ້ວ່າ ທາງລົດໄຟແມ່ນຈະໄດ້ຮັບການກໍ່ສ້າງ ໂດຍ ບັນດາບໍລິສັດຂອງຈີນ ໂດຍການນໍາໃຊ້ເທັກໂນໂລຍີທີ່ທັນສະໃໝ.

ບັນດາບໍລິສັດລາວ ຈະຍັງໄດ້ຮັບຜົນປະໂຫຍດ ເຊິ່ງ ມີຈໍານວນ 20 ບໍລິສັດຂອງລາວ ໄດ້ຮັບການຄັດເລືອກ ໃຫ້ເປັນຜູ້ຮັບເໝົາຍ່ອຍ ສໍາລັບວຽກງານການກໍ່ສ້າງ.

ປະທານ ສະພາອຸດສະຫະກໍາ ແລະ ການຄ້າ ແຫ່ງຊາດ ລາວ, ທ່ານ ອຸເດດ ສຸວັນນະວົງ, ໄດ້ກ່າວຕໍ່ ໜັງສືພິມ ວຽງຈັນທາມສ ວ່າ ຍັງບໍ່ທັນຈະແຈ້ງເທື່ອ ວ່າວຽກງານກໍ່ສ້າງອັນໃດ ທີ່ຈະຖືກຈັດສັນໃຫ້ແກ່ ບໍລິສັດຂອງລາວ ແລະ ຈະຕ້ອງການ ຈໍານວນແຮງງານ ແລະ ອາຫານ ຈາກລາວ ຫຼາຍປານ​ໃດ ທີ່ຈະສະໜອງໃຫ້ແກ່ໂຄງການທາງລົດໄຟ.

“ພວກເຮົາຍັງບໍ່ທັນໄດ້ຮັບການແຈ້ງການ ກ່ຽວກັບ ປະເດັນດັ່ງກ່າວນີ້ເທື່ອ. ແນ່ນອນ, ພວກເຮົາ ໄດ້ກະກຽມຄວາມພ້ອມຂອງຕົນເອງ ເພື່ອເຂົ້າຮ່ວມ ແລະ ສະໜັບສະໜູນໂຄງງານນີ້,” ທ່ານອຸເດດ ໄດ້ກ່າວ. ໄດ້ມີຄວາມຄືບໜ້າໃນການກະກຽມ ການກໍ່ສ້າງ.

ໃນລະຫວ່າງການຢ້ຽມຢາມລາວຢ່າງເປັນທາງການ ຂອງ ນາຍົກ ລັດຖະມົນຕີ ຂອງຈີນ ທ່ານ Li Keqiang ໃນລະຫ່ວາງ ວັນທີ 8-9, ເດືອນກັນຍາທີ່ຜ່ານມາ, ທັງສອງປະເທດໄດ້ຮ່ວມກັນເຊັນ ເອກະສານການຮ່ວມມື 20 ເອກະສານ. ໜຶ່ງໃນບັນດາເອກະສານດັ່ງກ່າວ ແມ່ນກ່ຽວຂ້ອງກັບ ບັນດາແຜນການ ການພັດທະນາ ທາງລົດໄຟ ລາວ-ຈີນ.

ລາງລົດ​ໄຟດ່ຽວ ​ຂະໜາດ​ມາດຕະຖານ 1​,435 ​ແມັດ ຕາມ​ແຜນ​ການ ຈະມີ 33 ສະຖານີ, ເຊິ່ງ 21 ແຫ່ງ ແມ່ນຈະຖືກດໍາເນີນການກ່ອນ, ອິງຕາມ ລັດຖະມົນຕີ ກະຊວງ ໂຍທາ ແລະ ຂົນສົ່ງ. ມັນຈະປະກອບມີ ອຸມຸງ 72 ​ແຫ່ງ ເຊິ່ງມີຄວາມຍາວທັງໝົດ 183,9 ກມ, ເຊິ່ງກວມ​ເອົາ 43 ເປີເຊັນ ຂອງ ຄວາມຍາວທັງໝົດຂອງສາຍທາງລົດໄຟ. ທາງລົດໄຟ ຍັງຈະລວມມີ ຂົວ 170 ແຫ່ງ ລວມຄວາມຍາວ 69,2 ກມ, ກວມເອົາ 15,8 ເປີເຊັນ ຂອງ ຄວາມຍາວທັງໝົດ.

ຜູ້ໂດຍສານທາງລົດໄຟ ຈະສາມາດເດີນທາງ ດ້ວຍຄວາມໄວ ສູງສຸດ 160 ກມ ຕໍ່ ຊົ່ວໂມງ, ເຊິ່ງ ຄວາມໄວສູງສຸດຂອງ ລົດໄຟສໍາລັບຂົນສິນຄ້າ ແມ່ນ 120 ກມ ຕໍ່ຊົ່ວໂມງ.

 

You can skip to the end and leave a response. Pinging is currently not allowed.

Leave a Reply

*

Powered by WordPress | Download Free WordPress Themes | Thanks to Themes Gallery, Premium Free WordPress Themes and Free Premium WordPress Themes