Working towards greater community control over land, forests and natural resources

ວິ­ໄສ​ທັດ​ ພັດ­ທະ­ນາ​ຊຸມ​ຊົນ​ຂອງ​ໂຄງ­ການ​ເຂື່ອນ​ໄຟ­ຟ້າ​ນ້ຳ​ງຽບ 1

“ເສດຖະກິດ-ສັງຄົມ” 16 ພະຈິກ 2015

ການ​ສ້າງ​ອາ­ຊີບ ແລະ​ ຍົກ​ສູງຄຸນ​ນະ​ພາບ​ຊີ­ວິດ​ຄື​ວິ­ໄສ​ທັດ​ພັດ­ທະ­ນາຊຸມ​ໃນ​ເຂດ​ກໍ່­ສ້າງ​ ໂຄງ­ການ​ເຂື່ອນ​ໄຟຟ້າ​ນ້ຳ​ງຽບ 1 ຊຶ່ງ​ແນ­ໃສ່​ສ້າງ​ຄວາມເຂັ້ມ­ແຂງ​ໃຫ້​ປະ­ຊາ­ຊົນ​ປະ­ມານ 3.000 ຄົນ ທີ່​ຈະ​ໄດ້​ຮັບ​ຜົນ​ກະ­ທົບ​ຈາກການ​ກໍ່­ສ້າງ​ເຂື່ອນ ທັງ​ນີ້​ທາງ​ໂຄງ­ການກໍ​ໄດ້​ປະ­ສານ​ງານ​ກັບ​ອຳ­ນາດ​ການ​ປົກຄອງ​ທ້ອງ­ຖິ່ນ ແລະ​ລົງ​ເຮັດ​ວຽກ​ຮ່ວມກັບ​ສະ­ມາ­ຊິກ​ຊຸມ​ຊົນ ໂດຍ​ອີງ­ໃສ່​ແນວທາງ​ນະ­ໂຍ­ບາຍ​ຂອງ​ພັກ ແລະ​ລັດ​ຖະບານ ທັງ​ພ້ອມ​ປະ­ຕິ­ບັດ​ຕາມ​ມາດ­ຖານສາ­ກົນ​ໃນ​ດ້ານ​ການ​ອອກ​ແບບ ແລະ ຈັດ​ຕັ້ງ​ປະ­ຕິ­ບັດ​ການ​ຊົດ​ເຊີຍ ລວມ​ໄປເຖິງ​ແຜນ​ງານ​ປັບ­ປຸງ​ຊີ­ວິດ​ການ​ເປັນ​ຢູ່ໃຫ້​ແກ່​ຄົນ​ໃນ​ຊຸມ​ຊົນ ເພື່ອ​ຮັບ­ປະ­ກັນວ່າ​ຊາວ­ບ້ານ​ທີ່​ຖືກ​ຍົກ­ຍ້າຍ​ຈະ​ມີ​ຊີ­ວິດ​ການ​ເປັນ​ຢູ່​ ທີ່​ດີ​ຂຶ້ນ​ກວ່າ​ເກົ່າ.

   ອີງ​ຕາມ​ການ​ສະ­ເໜີ​ຂ່າວ​ຂອງໜັງ­ສື­ພິມ ປະ­ຊາ­ຊົນ ສະ­ບັບ​ວັນ​ທີ 26 ຕຸ­ລາ 2015 ຜ່ານ​ມາ​ໄດ້​ລາຍ​ງານ​ວ່າ ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ​ງຽບ 1 ພວມ​ກະ­ກຽມ​ຍົກ­ຍ້າຍ​ປະ­ຊາ­ຊົນ​ທີ່ຄາດ​ວ່າ​ຈະ​ໄດ້​ຮັບ​ຜົນ​ກະ­ທົບ​ຈາກ​ໂຄງ ການ​ລວມ​ມີບ້ານ​ຫາດ​ຊາຍ​ຄຳ ແຂວງບໍ​ລິ​ຄຳ​ໄຊ ແລະ​ອີກ​ສີ່​ໝູ່​ບ້ານ​ທີ່​ຂຶ້ນ​ກັບເມືອງ​ຮົ່ມ ແຂວງ​ໄຊ​ສົມ­ບູນ ຊຶ່ງ​ຢູ່​ໃນ ຂອບ​ເຂດ​ທີ່​ຕັ້ງ​ໂຄງ­ການ​ເຂື່ອນ​ໄຟ­ຟ້ານ້ຳ​ງຽບ 1 ແລະ​ຄາດ​ວ່າ​ຈະ​ຖືກ​ນ້ຳຖ້ວມ​ພາຍ­ຫຼັງ​ການ​ກໍ່­ສ້າງ​ເຂື່ອນ​ໄຟ­ຟ້າສຳ­ເລັດ​ໃນ ​ປີ 2018 ສຳ­ລັບ​ເຂື່ອນ​ໄຟ ຟ້າ​ນ້ຳ​ງຽບ 1 ແມ່ນ​ມີ​ກຳ­ລັງ​ຕິດ​ຕັ້ງ 290 ເມ​ກາ​ວັດ ໃນ​ນັ້ນ​ກະ­ແສ​ໄຟ­ຟ້າ ປະ­ມານ 93% ຈະ​ຖືກ​ສົ່ງ​ຂາຍ​ໃຫ້­ການໄຟ­ຟ້າ​ຝ່າຍ​ຜະ­ລິດ​ແຫ່ງ​ປະ­ເທດ​ໄທ ສ່ວນ​ທີ່​ເຫຼືອ​ຈະ​ຂາຍ​ໃຫ້​ບໍ­ລິ­ສັດ​ໄຟ­ຟ້າ ລາວ.

ຢ່າງ­ໃດ​ກໍ​ດີ ເພື່ອ​ເຮັດ​ໃຫ້​ຊຸມ​ຊົນ​ໄດ້ຮັບ​ຜົນ​ກະ­ທົບ​ໜ້ອຍ​ທີ່​ສຸດ​ຈາກ​ການ​ດຳເນີນ​ ໂຄງ­ການ​ດັ່ງ­ກ່າວ ຈິ່ງ​ມີ​ການ​ວາງ ແຜນ ແລະ​ດຳ­ເນີນ​ງານ​ຕ່າງໆ​ກ່ຽວ​ກັບການ​ພັດ­ທະ­ນາ​ຊຸມ​ຊົນ​ທັງ​ນີ້ ທ່ານ ນິ​ລັນດອນ ຖາ­ວອນ​ສຸກ ຫົວ­ໜ້າ​ທີມ​ງານ ດ້ານ​ການ​ພັດ­ທະ­ນາ​ຊີ­ວິດ​ການ​ເປັນ​ຢູ່ຂອງ​ຊຸມ​ຊົນ​ໃນ​ເຂດ​ໂຄງ­ການ​ ເຂື່ອນໄຟ­ຟ້າ​ນ້ຳ​ງຽບ 1 ກໍ​ໄດ້​ເປີດ­ເຜີຍ​ວ່າ “ໄດ້​ມີ​ການ​ສະ­ໜອງ​ທຶນ​ໃນ​ເບື້ອງ​ຕົ້ນ ແລະ​ຊ່ວຍ​ຊາວ­ບ້ານ​ກະ­ກຽມ​ໜອງ​ປາ ແລະ​ເນື້ອ­ທີ່​ສຳ­ລັບ​ເຮັດ​ການ​ຜະ­ລິດໄປ​ພ້ອມ​ກັບ​ການ​ຝຶກ​ອົບ­ຮົມ​ ປະ­ຊາ­ຊົນໃຫ້​ຮູ້​ວິ­ທີ​ປູກ​ຜັກ ແລະ​ລ້ຽງ­ສັດ ເພື່ອເປັນ​ອາ­ຫານ ແລະ​ເປັນ​ສິນ­ຄ້າອີກ​ທັງໄດ້​ນຳ­ພາ​ປະ­ຊາ­ຊົນ​ໄປ​ທັດ­ສະ­ນະ​ສຶກສາ​ບັນ­ດາ​ ໂຄງ­ການ​ພັດ­ທະ­ນາ​ຕ່າງໆ​ທີ່ມີ​ຮູບ​ແບບ​ຄ້າຍ­ຄື​ກັນ ເພື່ອ​ໃຫ້​ເຂົາ­ເຈົ້າເຂົ້າ­ໃຈ  ແລະ​ສາ­ມາດ​ນຳ​ໃຊ້​ຄວາມ​ຮູ້​ທີ່ໄດ້​ຮຽນ​ໄດ້​ເຫັນ​ມາ​ ເພື່ອ​ນຳ​ໃຊ້​ເຂົ້າໃນ​ການ​ຜະ­ລິດ​ກະ­ສິ­ກຳ​ອັນ​ຈະ​ນຳລາຍ​ໄດ້​ມາ​ໃຫ້​ຄອບ­ຄົວ ແລະ​ຊຸມ​ຊົນ”.

ຂະ­ນະ​ທີ່ ທ່ານ ກູ​ຊົງ ປະ­ຊາ­ຊົນ​ຢູ່ບ້ານ​ຫາດ​ຊາຍ​ຄຳ​ກໍ​ໃຫ້​ຮູ້​ວ່າ “ພະ­ນັກງານ​ພັດ­ທະ­ນາ​ໂຄງ­ການ​ເຂື່ອນ​ໄຟ­ຟ້ານ້ຳ​ງຽບ 1 ໄດ້​ລົງ​ມາ​ສອນ​ວິ­ທີ​ລ້ຽງ​ໝູ ລ້ຽງ​ປາ ລ້ຽງ​ກົບ ແລະ​ອື່ນໆ ພ້ອມທັງ​ແນະ­ນຳ​ວິ­ທີ​ປູກ​ພືດ​ຜັກ​ສວນ​ຄົວ ແລະ​ປູກ​ເປັນ​ສິນ­ຄ້າ”.    ນອກ­ຈາກ​ການ​ລົງ​ສົ່ງ­ເສີມ​ຄວາມຮູ້​ດ້ານ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ​ ແລ້ວ ທາງ​ໂຄງ­ການ​ຍັງ​ໄດ້​ເຮັດວຽກ​ຮ່ວມ​ກັບ​ອຳ­ນາດ​ການ​ປົກ­ຄອງ ແລະ​ປະ­ຊາ­ຊົນ​ໃນ​ທ້ອງ­ຖິ່ນ​ເພື່ອ​ຮ່ວມກັນ​ປຸກ​ສ້າງ​ເຮືອນ​ຢູ່​ຖາ­ວອນ ພ້ອມ​ທັງສະ­ໜອງ​ສິ່ງ​ອຳ­ນວຍ​ຄວາມ​ສະ­ດວກຕ່າງໆ​ສຳ­ລັບ​ຊາວ­ບ້ານ​ທີ່​ຈະ​ຍ້າຍ​ ຖິ່ນຖານ​ເຂົ້າ​ມາ​ຢູ່​ບ້ານ​ຈັດ​ສັນ​ໃໝ່​ໃນ ແຂວງ​ບໍ​ລິ​ຄຳ​ໄຊ ຊຶ່ງ​ຕັ້ງ​ຢູ່​ທາງ​ທິດ​ຕາ ເວັນ​ຕົກ​ຂອງ​ອ່າງ​ດັກ​ນ້ຳ​ສຳ­ຮອງ​ຂອງເຂື່ອນ  ແລະ​ຄາດ​ວ່າ​ຈະ​ສາ­ມາດ​ຍົກຍ້າຍ​ເຂົ້າ​ມາ​ໃນ​ລະ­ຫວ່າງ​ຫົກ​ເດືອນຕົ້ນ​ປີ 2016-2017 ທີ່​ຈະ​ມາ​ເຖິງ​ນີ້.    ຂະ­ນະ​ທີ່ ທ່ານ ພຣະ​ພາດ ພັນ​ອາຣາມ ຮອງ​ອຳ­ນວຍ​ການ​ບໍ­ລິ­ຫານ​ພະ​ແນກ​ສິ່ງ­ແວ­ດລ້ອມ ແລະ​ສັງ­ຄົມ​ຂອງບໍ­ລິ­ສັດ​ເຂື່ອນ​ໄຟ­ຟ້າ​ນ້ຳ​ງຽບ 1 ທັງ​ເປັນບໍ­ລິ­ສັດ​ພັດ­ທະ­ນາ​ໂຄງ­ການ​ດັ່ງ­ກ່າວ ກໍ​ໃຫ້​ຮູ້​ອີ​ກວ່າ ປະ­ຊາ­ຊົນ​ທີ່​ໄດ້​ຮັບ​ຜົນກະ­ທົບ​ຈາກ​ໂຄງ­ການ​ກໍ່­ສ້າງ​ເຂື່ອນ​ໄຟຟ້າ​ນ້ຳ​ ງຽບ 1 ສາ­ມາດ​ເລືອກ​ທີ່​ຈະຍ້າຍ​ເຂົ້າ​ມາ​ຢູ່​ໃນ​ເຂດ​ຈັດ​ສັນ​ໃໝ່ ຫຼື ຈະເອົາ​ຄ່າ​ຊົດ​ເຊີຍ​ທັງ​ໝົດ ແລະ​ຍົກ­ຍ້າຍໄປ​ຢູ່​ບ່ອນ​ອື່ນ​ດ້ວຍ​ຕົນ​ເອງ​ກໍ​ໄດ້”.

ຢ່າງ­ໃດ​ກໍ​ດີ ມາ​ຮອດ​ປະ­ຈຸ​ບັນ​ນີ້ ແຜນ​ງານ​ດັ່ງ­ກ່າວ​ກໍ​ມີ​ຄວາມ​ຄືບ​ໜ້າ​ດີສົມ­ຄວນ ຊຶ່ງ​ພາຍ­ຫຼັງ​ໄດ້​ຮັບ​ການ​ຈັດຕັ້ງ​ປະ­ຕິ­ບັດ​ມາ​ບໍ່​ຮອດ​ໜຶ່ງ​ປີ​ກໍ​ເຫັນ​ ວ່າປະ­ຊາ­ຊົນ​ໃນ​ບ້ານ​ຫາດ​ຊາຍ​ຄຳ​ໄດ້​ພາກັນ​ເຂົ້າ​ຮ່ວມ​ກິດ­ຈະ­ກຳ ແລະ​ໃນ​ນັ້ນ​ກໍມີ​ຫຼາຍ​ຄົວ​ເຮືອນ​ສາ­ມາດ​ຈຳ­ໜ່າຍ​ຜົນຜະ­ລິດ​ເຊັ່ນ ປາ­ດຸກ ແລະ​ພືດ​ຜັກ​ໃຫ້​ຜູ້​ບໍລິ​ໂພກ​ໃນ​ທ້ອງ­ຖິ່ນ​ລວມ​ເຖິງ​ບັນ­ດາ​ບໍ­ລິ­ສັດ​ຮັບ​ ເໝົາ​ໂຄງ­ການ ອັນ​ໄດ້​ສ້າງຄວາມ​ຕື່ນ​ຕົວ​ຕໍ່​ການ​ຜະ­ລິດ​ເປັນ​ສິນ­ຄ້າ ຊຶ່ງ​ຖື​ເປັນ​ອີກ​ໜຶ່ງ​ຄວາມ​ສຳ­ເລັດ​ຂອງການ​ພັດ­ທະ­ນາ​ຊຸມ​ຊົນ ແລະ​ເປັນ​ພື້ນຖານ​ໃຫ້​ແກ່​ການ​ພັດ­ທະ­ນາ​ເສດ​ຖະກິດ-ສັງ­ຄົມ​ໃນ​ທ້ອງ­ຖິ່ນ.

 

You can skip to the end and leave a response. Pinging is currently not allowed.

Leave a Reply

*

Powered by WordPress | Download Free WordPress Themes | Thanks to Themes Gallery, Premium Free WordPress Themes and Free Premium WordPress Themes